Texnologiya dünyasında süni intellekt və robotexnikanın birləşməsi artıq gündəlik həyatın bir parçasına çevrilir. İnsanabənzər (humanoid) robotların funksionallığının və emosional intellektinin artırılması, gələcəkdə bu cihazların “kiber-yoldaş” kimi istifadəsini bir reallığa çevirir. Bu sahənin liderlərindən olan “Ubtech” şirkəti özünün yeni məhsul xəttini təqdim etməklə bazarda ciddi iddialarını ortaya qoyub.
ELAZ.İNFO xəbər verir ki, “Ubtech” şirkəti “U1” adlı yeni ultrabionik humanoid robotlarının qiymətlərini açıqlayıb. Şirkətin baş direktoru Çjou Tszyanın (Zhou Jian) keçirilən təqdimat mərasimində verdiyi məlumata görə, robotların qiyməti “Lite” versiyası üçün təxminən 119 800 Çin yuanından (təxminən 17 630 ABŞ dolları) başlayaraq, “Ultra” premium modeli üçün 1 milyon yuana (təxminən 147 200 ABŞ dolları) qədər dəyişir.
Bu robotlar öz texniki imkanları ilə diqqət çəkir. Belə ki, “kiber-yoldaşlar” adlandırılan “U1” modelləri 88 hərəkət sərbəstliyi dərəcəsinə (degree of freedom) malikdir və süni intellektin emosional rezonans modeli ilə təchiz olunub. Bu xüsusiyyət onlara istifadəçilərlə daha təbii və emosional qarşılıqlı əlaqə qurmağa imkan verir.
Bazarda böyük maraqla qarşılanan yeni robotlar artıq ciddi rəqəmlərlə ifadə olunan sifarişlər alıb. Şirkət rəhbərinin sözlərinə görə, cari il üçün artıq 11 000-dən çox ilkin sifariş (pre-order) qəbul edilib. Bu, ictimaiyyətin və bazarların “kiber-yoldaşlara” olan yüksək etimadının və gələcəkdə humanoid robotlara tələbatın artacağının göstəricisidir.
Ruslan MƏMMƏDOV