Cənubi Qafqaz regionu bu gün qlobal geosiyasi dəyişikliklərin mərkəzində yer alaraq, öz gələcəyini müəyyən edən kritik bir mərhələdən keçir. Münaqişədən sonrakı dövrdə sülhün bərqərar olunması, regional nəqliyyat və kommunikasiya xətlərinin açılması, eləcə də iqtisadi inkişafın təmin edilməsi istiqamətində atılan hər bir addım regionun gələcək sabitliyi üçün həlledici əhəmiyyət daşıyır. Bu məqsədlə Yunanıstanın Krit adasında keçirilən beynəlxalq seminar regional əməkdaşlığın yeni vektorlarını müəyyənləşdirmək üçün mühüm platformaya çevrilib.
ELAZ.İNFO xəbər verir ki, millət vəkili Milli Məclisin Deputatı Razi Nurullayev Kritin İraklion şəhərində “Cənubi Qafqazda davamlı inkişaf naminə regional əməkdaşlıq” mövzusunda keçirilən seminarda iştirak edir. Tədbir regionun gələcəyini müzakirə etmək üçün müxtəlif ölkələrdən olan ekspertləri və siyasətçiləri bir araya gətirib.
Razi Nurullayev sosial media hesabında paylaşdığı məlumatda qeyd edib ki, seminarın əsas müzakirə mövzuları Ermənistan-Azərbaycan sülh prosesi, regional təhlükəsizliyin inkişafı, nəqliyyat və kommunikasiya marşrutlarının açılması, eləcə də Avroatlantik birliyinin dəstəyi ilə dayanıqlı regional əməkdaşlığın gücləndirilməsi yolları olub. “Dərin geosiyasi dəyişikliklər dövründə Cənubi Qafqazda davamlı sülh, sabitlik və iqtisadi inkişafın təmin edilməsi üçün konstruktiv dialoq və praktiki əməkdaşlıq alternativi olmayan əsas vasitədir”, – deyə Razi Nurullayev vurğulayıb.
Regional təhlükəsizliyin təminatı və iqtisadi inteqrasiya prosesləri beynəlxalq ictimaiyyətin də diqqət mərkəzindədir. İrakliondakı bu tədbir, region dövlətləri arasında etimad mühitinin yaradılması və qarşılıqlı faydalı layihələrin reallaşdırılması üçün yeni dialoq kanallarının açılmasına xidmət edir.
Ruslan MƏMMƏDOV