Trampın Müttəfiqləri İlə Bağlı Qeydlər Qorunmalıdır

17.11.2026

ABŞ Ədliyyə Nazirliyi Massaçusets ştatından olan Demokrat senator Elizabet Uorrenə rəsmi xəbərdarlıq göndərərək, Prezident Donald Tramp və onun müttəfiqlərinə qarşı aparılan hər hansı istintaqla bağlı sənədlərin qorunub saxlanılmasını tələb edib. Əks halda, bunun “ciddi” hüquqi nəticələrə səbəb olacağı bildirilib.

ELAZ.INFO xəbər verir ki, “Daily Mail” nəşrinin məlumatına görə, yanvar ayında Senatın Bankçılıq Komitəsinə rəhbərlik edəcəyi gözlənilən Uorrenə ünvanlanan bu məktub Texasın Cənub Dairəsi üzrə ABŞ prokuroru Aaron Reyts tərəfindən göndərilib. Prokuror Aaron Reyts sosial şəbəkədə paylaşdığı məktubda Uorreni komitə sədrliyi səlahiyyətlərindən “Prezident Trampın şəxsi tərəfdaşlarını hədəf almaq” üçün istifadə etməyə hazırlaşmaqda ittiham edib. Məktubda qeyd olunub ki, Amerika xalqı seçilmiş rəsmilərin təcavüzkar və təqibedici hökumət hərəkətləri ilə üzləşmədən sərbəst şəkildə birləşmək hüququna malikdir.

Reyts həmçinin senatora “Konqres araşdırmalarından silah kimi istifadə etmək və vətəndaşları əsas konstitusiya hüquqlarından məhrum etmək niyyəti” ilə əlaqəli bütün materialları toxunulmaz saxlamaq barədə göstəriş verib. 120-ci Konqres ərəfəsində oxşar xəbərdarlıq məktubları Konnektikut senatoru Riçard Blumentala və Nümayəndələr Palatasının Nəzarət Komitəsinin sədri Robert Qarsiyaya da göndərilib. “Wall Street Journal”ın məlumatına əsasən, bu üç Demokrat qanunverici Trampın əsas ianə toplayıcısı Meredit O’Rurk barədə məlumat tələb edən araşdırma aparırlar. Onlar O’Rurkun Ağ Evin bal zalı və ya digər “xüsusi layihələr” üçün vəsait toplama prosesində iştirak edib-etmədiyini yoxlayırlar. Demokratların Konqresdə çoxluğu yenidən ələ keçirməsindən sonra bu araşdırmanın hansı miqyasda davam edəcəyi hələlik qeyri-müəyyəndir.

Məsələ ilə bağlı “Daily Mail”ə açıqlama verən Ədliyyə Nazirliyinin sözçüsü bildirib ki, nəzarət səlahiyyəti özəl vətəndaşları Birinci Düzəliş hüquqlarından (söz və toplaşmaq azadlığı) istifadə etdiklərinə görə təhdid etmək üçün lisenziya deyil. Sözçü əlavə edib ki, Konqres Ədliyyə Nazirliyinə insanların konstitusiya hüquqlarını qəsdən əlindən alan şəxsləri araşdırmaq səlahiyyəti verib. Senator Elizabet Uorren nəşrin şərh sorğusuna cavab verməyib. Lakin oxşar xəbərdarlıq alan Nümayəndələr Palatasının Nəzarət Komitəsinin üzvü Robert Qarsiya daha əvvəl Ağ Evin bu addımını tənqid edərək, bunun “Komitənin konstitusiya ilə qorunan Konqres nəzarəti hüququnu pozmaq təhdidi” olduğunu vurğulayıb:

“Açıq danışaq: Konqresin səlahiyyəti Ağ Evin icazəsindən deyil, Konstitusiyanın I Maddəsindən qaynaqlanır.”

Ruslan MƏMMƏDOV 🖋️

👁 220