Salyan rayonunda Ümummilli Lider Heydər Əliyevin anadan olmasının 103-cü ildönümü münasibətilə gənc zəka sahibləri arasında şahmat yarışı təşkil edilib.
ELAZ.İNFO xəbər verir ki, aprelin 13-dən Salyan Rayon Uşaq-Gənclər İdman-Şahmat Məktəbində rayon birinciliyinə start verilib. Regional idarələrin, yerli İcra Hakimiyyətinin və YAP rayon təşkilatının birgə təşkilatçılığı ilə keçirilən tədbirdə əvvəlcə Ulu Öndərin əziz xatirəsi bir dəqiqəlik sükutla yad edilib. İndi idman yarışlarını sadəcə fiziki və ya zehni rəqabət hesab edənlər bir məqama diqqət etsinlər ki, bu cür turnirlər həm də müstəqilliyimizin memarı olan dahi şəxsiyyətin irsinə ehtiramın və gənc nəslin milli ruhda formalaşmasının əyani nümunəsidir.
Tədbirdə çıxış edən rəsmi şəxslər – Elmar Əbilov, Emin Ağayev, Bilal Ələkbərov və Vüqar Ağayev Heydər Əliyevin zəngin dövlətçilik yolundan, Azərbaycanın intibahındakı əvəzsiz rolundan bəhs edərək şahmatçılara uğurlar arzulayıblar. Qeyd olunub ki, ölkəmizin bu gün dünyada qazandığı nüfuz məhz Ümummilli Liderin uzaqgörən siyasətinin və dəmir iradəsinin nəticəsidir. Hazırda gərgin mübarizə şəraitində keçən birinciliyə aprelin 16-da yekun vurulacaq və qaliblər müəyyən ediləcəkdir.
Ruslan Məmmədov
