Tehran administrasiyası regionun beş aparıcı ərəb dövlətini ABŞ və İsrailin hərbi əməliyyatlarına dəstək verməkdə ittiham edərək, onlardan dəymiş ziyanın ödənilməsini istəyib.
ELAZ.İNFO xəbər verir ki, İranın BMT-dəki daimi nümayəndəsi Əmir Səid İravani Bəhreyn, İordaniya, Qətər, Birləşmiş Ərəb Əmirlikləri və Səudiyyə Ərəbistanının İrana qarşı müharibədə “şərik” olduqlarını bəyan edib. İndi regional gərginliyin yalnız böyük güclər arasında olduğunu düşünənlər bir məqama diqqət etsinlər ki, bu ittihamlar Yaxın Şərqdəki diplomatik uçurumu daha da dərinləşdirir və müsəlman ölkələri arasında yeni bir hüquqi-siyasi qarşıdurma mərhələsinin əsasını qoyur.
Tasnim agentliyinin məlumatına görə, İravani qeyd edib ki, sözügedən dövlətlər “beynəlxalq öhdəliklərini pozaraq” İrana vurulan maddi və mənəvi zərərə görə tam məsuliyyət daşıyırlar. İran tərəfi ərəb ölkələrinin konkret olaraq hansı hərəkətlərini “şəriklik” kimi qiymətləndirdiyini açıqlamasa da, bu tələbin bölgədəki strateji tarazlığa ciddi təsir edəcəyi gözlənilir. Hazırda Tehranın bu tələbi beynəlxalq hüquq müstəvisinə çıxarıb-çıxarmayacağı dünya birliyi tərəfindən diqqətlə izlənilir.
Ruslan Məmmədov
