Rusiya Federasiyasında daxili və xarici siyasətin gələcək kursunu müəyyən edən, həmçinin ölkənin iqtisadi-hərbi potensialının gücləndirilməsinə yönəlmiş mühüm bəyanatlar səsləndirilib. Moskvada keçirilən hakim partiyanın toplantısı dövlətin hazırkı qlobal çağırışlara qarşı strategiyasını ortaya qoyub.
ELAZ.İNFO xəbər verir ki, Rusiya Prezidenti Vladimir Putin hakim “Vahid Rusiya” (“Edinaya Rossiya”) partiyasının qurultayında çıxış edərək ölkənin mövcud vəziyyəti və gələcək planları barədə bir sıra mühüm bəyanatlar səsləndirib. Rusiya liderinin çıxışından irəli gələn əsas tezislər aşağıdakılardır: Cəbhədəki vəziyyət və terror təhlükəsi: Ukrayna qoşunlarının bütün döyüş xətti boyu geri çəkildiyini iddia edən Putin, Kiyev rejiminin məhz bu səbəbdən açıq şəkildə terror metodlarına əl atdığını bildirib. Qərbin siyasəti və daxili sabitlik: Rusiya lideri Qərbin Rusiyanı döyüş meydanında məğlub edə bilmədiyini, bu üzdən ölkə daxilindəki siyasi vəziyyəti sabitləşdirmək üçün əbəs yerə cəhdlər göstərdiyini vurğulayıb.
Təhlükəsizlik və sərhədlərin toxunulmazlığı: Rusiyanın və onun vətəndaşlarının təhlükəsizliyinin, eləcə də ölkə sərhədlərinin toxunulmazlığının tam şəkildə təmin ediləcəyi qətiyyətlə diqqətə çatdırılıb. İqtisadiyyatda texnoloji sıçrayış: Rusiya iqtisadiyyatının bütün əsas istiqamətlər üzrə yeni texnoloji səviyyəyə çıxarılacağı qeyd olunub.
Mövcud vəziyyətdən asılı olaraq bəzi cari planlara düzəlişlər edilsə də, dövlətin bütün strateji planlarının tam həcmdə reallaşdırılacağı bəyan edilib. Rusiyanın həlledici bir dövr yaşadığını deyən Putin, ölkənin ayaqda möhkəm durduğunu və öz fundamental maraqlarını müdafiə etməyə hazır olduğunu bildirib. O, ənənəvi dəyərlərə söykənməyin milli birliyin güclü təməli olduğunu, xüsusi hərbi əməliyyatın iştirakçılarının isə Rusiyanın əsl elitasını təşkil etdiyini vurğulayıb. Rusiya lideri ölkədə parlament seçkilərinin nəzərdə tutulmuş qrafikə uyğun olaraq, vaxtında keçiriləcəyini əlavə edib.
Ruslan MƏMMƏDOV