Rusiya-Ukrayna müharibəsinin ön cəbhəsində və kəşfiyyat masalarında gərginlik pik həddə çatıb. Ukrayna rəsmilərinin son iddiaları yaxın aylarda müharibənin daha genişmiqyaslı və qanlı mərhələyə qədər irəliləyə biləcəyindən xəbər verir.
ELAZ.İNFO xəbər verir ki, Ukrayna Milli Təhlükəsizlik və Müdafiə Şurasının Dezinformasiyaya Qarşı Mübarizə Mərkəzinin rəhbəri Andrey Kovalenko Rusiyanın payız aylarına qədər ən azı 500 min nəfərlik yeni bir səfərbərlik dalğasına hazırlaşdığını bəyan edib. Ukrayna tərəfinin əldə etdiyi kəşfiyyat məlumatlarına görə, Kremlin əsas fiqurlarından Sergey Kiriyenko və Baş Qərargah rəisi Valeri Gerasimov Rusiya Prezidenti Vladimir Putini bu addımın cəbhədə həlledici üstünlük təmin edəcəyinə inandırıblar. Ukrayna tərəfinin iddiasına görə, Kremlin bu irimiqyaslı planı iki əsas mərhələdən ibarətdir:
Birinci qrup (Təcili cəbhəyə göndərilənlər): Səfərbər olunanların bir hissəsi cəmi iki həftəlik sürətləndirilmiş hazırlıq keçdikdən sonra dərhal şərq cəbhəsində yaranmış canlı qüvvə çatışmazlığını (“deşikləri”) bağlamaq üçün döyüşlərə atılacaq.
İkinci qrup (Yeni cəbhə xətti üçün): Digər qrup isə ən azı bir ay ərzində təlim keçərək, Ukrayna ilə sərhədin tamamilə yeni bir istiqamətində hücum əməliyyatlarına başlamaq üçün ehtiyat qüvvə kimi saxlanılacaq.
Andrey Kovalenko payız və qış aylarında texnoloji üstünlüklə (dronlar, idarəolunan aviasiya bombaları) müşayiət olunan ağır piyada döyüşlərinin gözlənildiyini bildirib. Ukrayna tərəfinin səsləndirdiyi bu ssenari reallaşacağı təqdirdə cəbhədəki qüvvələr nisbətinə təsirini bir neçə kritik faktor müəyyən edəcək: Rusiya ordusunun say üstünlüyünü birdən-birə yarım milyon nəfər artırması Ukrayna müdafiə xətlərinə düşən mexaniki təzyiqi kəskin şəkildə artıracaq. Hətta zəif təlim keçmiş qüvvələr belə Ukrayna ordusunun sursat və resurslarını tükətmək, həmçinin cəbhənin müəyyən nöqtələrində taktiki irəliləyişlər əldə etmək üçün kifayət edə bilər.
Cəmi iki həftəlik hazırlıq keçmiş piyadanın müasir texnoloji müharibədə effektivliyi olduqca aşağıdır. Bu cür sürətli cəbhəyə göndərmələr Rusiya tərəfində canlı qüvvə itkilərinin həndəsi silsilə ilə artmasına səbəb olacaq. Lakin itkilərin kompensasiya edilməsi mexanizmi qurulacağı təqdirdə, bu, Ukrayna tərəfini də daim geri çəkilməyə və ya insan resurslarını xərcləməyə məcbur edəcək. 500 min insanı eyni vaxtda geyindirmək, silahlandırmaq, qidalandırmaq və ağır texnika ilə təmin etmək Rusiya hərbi-sənaye kompleksi üçün ciddi sınaqdır. Əgər bu qüvvə yetərincə zirehli texnika və artilleriya ilə dəstəklənməzsə, qüvvələr nisbətində gözlənilən strateji dönüş baş verməyə bilər.
Belə bir dalğanın qarşısını almaq üçün Kiyev öz növbəsində Qərb tərəfdaşlarından uzaqmənzilli raketlərin (ATACMS, Storm Shadow) Rusiya ərazisinin dərinliklərindəki təlim düşərgələrinə və loqistik mərkəzlərinə qarşı tətbiq edilməsi icazəsini almağa çalışacaq. Eyni zamanda Ukraynanın da öz daxili səfərbərlik mexanizmlərini gücləndirməsi qaçılmaz olacaq.
Ruslan MƏMMƏDOV
