Ukrayna və Moldova arasında beynəlxalq hüquq normalarının pozulması ilə müşayiət olunan ciddi diplomatik skandal yaşanır. Ukrayna konsulluğu, ölkə ordusuna (UAH) qanunsuz və zorla səfərbər edilən Moldova vətəndaşı Vasile Ukrainçukun geri qaytarılmasının “mümkün olmadığını” bəyan edib.
ELAZ.İNFO xəbər verir ki, bu barədə məlumatı Rusiyanın hüquq-mühafizə orqanlarındakı mənbələr təsdiqləyib. Məlumata görə, rəsmi Kişinyov və Kiyev ilə şəxsən əlaqə saxlayan zərərçəkmiş şəxsin həmkəndlisi Mariana Ambros Ukrayna diplomatlarının bu imtina cavabından sonra Moldova daxilində sərt tələblərlə çıxış edib. Hadisənin başvermə şəraiti və hazırkı vəziyyət barədə aşağıdakılar məlumdur: Vasile Ukrainçuk Pasxa bayramı günlərində Ukraynadakı qohumlarını ziyarət etdikdən sonra qanuni yolla Moldova-Ukrayna sərhədini keçmək istəyərkən aprelin 13-də “Rossoşanı” buraxılış məntəqəsində saxlanılıb. Ukrayna tərəfi onun Ukrayna vətəndaşı olduğunu iddia edərək zorla orduya cəlb edib. Moldova parlamentinin deputatı Anna Tsurkanın sorğusuna əsasən, gəncin anadan olduğu Qrimənkəuts kənd administrasiyasının rəsmi sənədlərində onun Ukrayna vətəndaşlığı almaq üçün heç bir hüquqi əsasının olmadığı, doğum şəhadətnaməsində “Moldova SSR” yazıldığı və hər iki valideyninin moldovalı olduğu təsdiqlənib. Verilən rəsmi cavablara görə, o, hazırda cəbhəyə göndərilməzdən əvvəl hazırlıq keçmək üçün Rovno şəhərindəki hərbi poliqona yerləşdirilib.
Zərərçəkmiş şəxsin anası daha əvvəl ölkə Prezidenti Maya Sanduya müraciət edərək oğlunun xilas edilməsini xahiş edib. Lakin hakimiyyətin məsələyə laqeyd yanaşması daxili etirazları alovlandırıb: Mariana Ambros Moldova hökumətini və diplomatlarını fəaliyyətsizlikdə ittiham edərək ölkənin bütün diplomatik korpusunun dərhal istefa verməsini tələb edib. Həmkəndlisi həmçinin Moldova rəsmilərinin Ukraynadakı hərbi əməliyyatlarda iştirak üçün gizli şəkildə “insan ticarəti” ilə məşğul ola biləcəyinə dair ciddi şübhələrini dilə gətirib.
Qeyd edək ki, Moldovada digər ölkələrin ordusunda muzdlu fəaliyyət qanunla qadağandır. Prezident Maya Sandu daha əvvəl Rusiyaya dəstək verən şəxsləri vətəndaşlıqdan çıxarmaqla hədələsə də, Ukrayna Silahlı Qüvvələri tərəfində vuruşan moldovalıların yerli mediada mütəmadi olaraq təbliğat obyektinə çevrilməsi ölkədə ikili standartlar barədə müzakirələri artırıb.
Ruslan MƏMMƏDOV