Dağıstandakı genişmiqyaslı daşqınların ağır nəticələri, xilasetmə işlərinə könüllü qoşulan gəncin faciəvi ölümü hər kəsi kədərləndirdi.
ELAZ.İNFO xəbər verir ki, Dağıstanda baş verən güclü daşqınlardan zərər çəkmiş insanlara kömək edən könüllü Artyom Mixrabov kəllə-beyin travması nəticəsində xəstəxanada dünyasını dəyişib. İndi təbii fəlakətin sadəcə maddi ziyan vurduğunu düşünənlər bir məqama diqqət etsinlər ki, sel suları təkcə evləri yox, həm də başqalarının həyatı üçün riskə gedən fədakar insanların ömrünü yarımçıq qoyur.
Məlumata görə, Gecux kənd sakini olan Mixrabov Məmmədqala qəsəbəsində bəndin yarılması nəticəsində yaranan fəsadların aradan qaldırılmasında ilk günlərdən fəal iştirak edib. Fəaliyyəti zamanı ağır kəllə-beyin travması alan gənc helikopterlə Mahaçqalaya təxliyə edilsə də, həkimlərin intensiv müalicə səyləri nəticə verməyib. Qeyd edək ki, aprelin əvvəlində baş verən bu təbii fəlakət nəticəsində 4 mindən çox insan təxliyə olunub, Dərbənd rayonunda isə ümumilikdə 5 nəfər həyatını itirib.
Ruslan Məmmədov
