Avropanın ən təhlükəsiz və elit bölgələrindən biri hesab edilən Monako knyazlığında baş verən son hadisə dünya mediasının diqqət mərkəzindədir. Partlayışın hədəfi və xəsarət alanların şəxsiyyəti ilə bağlı irəli sürülən iddialar hadisənin pərdəarxası məqamlarına dair müxtəlif versiyaların yaranmasına səbəb olub.
ELAZ.İNFO xəbər verir ki, Monakoda qeydə alınan partlayış nəticəsində xəsarət alan şəxslər arasında tanınmış ukraynalı oliqarx və onun ailə üzvləri ola bilər. Bu barədə Fransanın nüfuzlu “Le Figaro” qəzeti özünün etibarlı mənbəsinə istinadən məlumat yayıb.
Yayılan ilkin məlumatlarda xəsarət alan ukraynalı milyarderin adı və soyadı rəsmi olaraq açıqlanmır. Lakin qeyd olunur ki, hadisə nəticəsində oliqarxla bərabər onun yaxın ailə üzvləri də zərər çəkib.
Bundan əvvəl isə “Monaco-matin” qəzeti partlayış zamanı xəsarət alanların yaş qrupları barədə məlumat dərc etmişdi. Məlumata görə, yaralananlar arasında 50-60 yaşlarında iki şəxs və 13 yaşlı bir yeniyetmə var. Hadisə şahidlərinin və tibb mənbələrinin bildirdiyinə görə, xəsarət alanların hamısının vəziyyəti hazırda ağır qiymətləndirilir. Knyazlıq rəsmiləri hadisənin başvermə səbəbləri və zərərçəkənlərin tam kimliyi ilə bağlı hələlik geniş rəsmi bəyanat verməyiblər.
Ruslan MƏMMƏDOV