Bakı Qran-Prisinin qalibi bəlli oldu: Russell son döngəyədək təzyiq altında qaldı

ELAZ.İNFO xəbər verir ki, Bakıda keçirilən Formula 1 Azərbaycan Qran-Prisi gərgin finişlə yadda qalıb. George Russell Mercedes bolidi ilə yarışı qazanaraq mövsümdə üçüncü qələbəsini əldə edib.

Britaniyalı pilot 51 dövrəni 1 saat 38 dəqiqə 2,143 saniyəyə başa vurub. Max Verstappen finişə cəmi 0,196 saniyə gecikmə ilə ikinci çatıb. Üçüncü yeri isə Red Bull pilotu Isack Hadjar tutub.

Yarışın dramatik tərəflərindən biri çoxsaylı qəza və texniki problemlər olub. Altı pilot yarışı başa çatdıra bilməyib. McLaren-in dünya çempionu Lando Norris də finişə çata bilməyənlər arasında olub.

Russell üçün Bakı qələbəsi xüsusilə önəmlidir. Bu nəticə onun mövsümdə üçüncü, Azərbaycan Qran-Prisində isə ilk qələbəsidir. Mercedes pilotu çempionat lideri Kimi Antonellinin xal fərqini də azaldıb.

Qeyd edək ki, Bakı yarışı bir daha şəhər trasının gözlənilməz nəticələr üçün əlverişli olduğunu göstərdi.

İslam MAHMUDOV