Birləşmiş Ərəb Əmirliklərində dəhşətli zəncirvari qəza: 14 nəfər ölüb, 30 nəfər yaralanıb
ELAZ.İNFO xəbər verir ki, Birləşmiş Ərəb Əmirliklərinin Füceyrə əmirliyində baş verən ağır yol-nəqliyyat hadisəsi çoxsaylı insan tələfatı ilə nəticələnib. Noyabrın 12-də qeydə alınan zəncirvari qəza nəticəsində 14 nəfər həyatını itirib, 30 nəfər müxtəlif dərəcəli bədən xəsarətləri alıb.
BƏƏ Daxili İşlər Nazirliyi və Füceyrə Polis Baş İdarəsinin yaydığı məlumata görə, hadisə Şeyx Xəlifə bin Zayed avtomobil yolunda, Füceyrə əmirliyinin girişinə yaxın ərazidə baş verib. İlkin araşdırmalar qəzanın yük avtomobilinin sürücüsünün idarəetməni itirməsi nəticəsində meydana gəldiyini göstərir.
Belə ki, hərəkətdə olan yük avtomobili əvvəlcə qarşısındakı nəqliyyat vasitələrindən biri ilə toqquşub, daha sonra aşıb və yolun hərəkətin sıx olduğu hissəsində dayanmış digər avtomobillərə çırpılıb. Toqquşmadan sonra yük avtomobilində yanğın başlayıb və alov qısa müddətdə ətrafdakı nəqliyyat vasitələrinə də yayılıb.
Rəsmi məlumatlara əsasən, hadisəyə ümumilikdə 23 nəqliyyat vasitəsi cəlb olunub. Onların 18-i minik avtomobili, beşi isə yük avtomobili olub. Yanğının geniş əraziyə yayılması və avtomobillərin bir-birinə çırpılması faciənin miqyasını daha da ağırlaşdırıb.
Hadisə barədə məlumat daxil olduqdan sonra polis, təcili tibbi yardım, mülki müdafiə və xilasetmə xidmətlərinin əməkdaşları dərhal əraziyə göndəriliblər. Xüsusi təyinatlı qruplar yanğının söndürülməsi, yaralıların dağıntılar və zədələnmiş avtomobillər arasından çıxarılması, həmçinin onların yaxınlıqdakı xəstəxanalara çatdırılması istiqamətində fəaliyyət göstəriblər.
Füceyrə Polis Baş İdarəsinin son açıqlamasına görə, yaralılardan 15-i ilkin tibbi yardım və müalicədən sonra xəstəxanadan evə buraxılıb. Digər 15 nəfərin müalicəsi isə tibb müəssisələrində davam etdirilib.
Həlak olanlar arasında BƏƏ vətəndaşlarının da olduğu bildirilib. Bəzi qurbanların şəxsiyyətinin müəyyənləşdirilməsi üçün DNT ekspertizası aparıldığı qeyd olunub. Yaralıların müxtəlif ölkələrin, o cümlədən BƏƏ, Oman, Hindistan, Braziliya, Pakistan, İordaniya və Misirin vətəndaşları olduğu açıqlanıb.
Hadisə ilə bağlı BƏƏ-nin aidiyyəti qurumları tərəfindən hüquqi və texniki araşdırmalar davam etdirilir. Səlahiyyətli orqanlar qəzanın bütün təfərrüatlarının müəyyənləşdirilməsi üçün müvafiq tədbirlər görürlər.
Füceyrə Polis Baş İdarəsi sürücülərə müraciət edərək yol hərəkəti qaydalarına ciddi əməl etməyin, sürət həddini aşmamağın və xüsusilə sıx hərəkət olan ərazilərdə nəqliyyat vasitələri arasında təhlükəsiz məsafə saxlamağın vacibliyini vurğulayıb.
Birləşmiş Ərəb Əmirliklərində baş verən bu faciə yol hərəkəti təhlükəsizliyinin təmin olunmasının, sürücülərin diqqətli davranmasının və ağırtonnajlı nəqliyyat vasitələrinin hərəkətinə nəzarətin nə qədər mühüm olduğunu bir daha nümayiş etdirib.
İlahə BAYINDIR
