Cənubi Qafqazda sülh və kommunikasiyaların açılması istiqamətində gedən proseslər özünü rəsmi statistik rəqəmlərdə də göstərməyə başlayıb. 1991-ci ildən bəri tamamilə dayandırılmış iqtisadi münasibətlərdə 35 ildən sonra ilk rəsmi ticarət əməliyyatları qeydə alınıb.
ELAZ.İNFO xəbər verir ki, Dövlət Gömrük Komitəsinin (DGK) açıqladığı “Xarici Ticarətin Gömrük Statistikasına dair Hesabat”da ilk dəfə olaraq Ermənistanla idxal-ixrac əməliyyatları öz əksini tapıb. Rəqəmlər hələlik simvolik görünsə də, bu fakt regionun iqtisadi mənzərəsinin dəyişməsindən xəbər verir.
Ticarət dövriyyəsinin əsas göstəriciləri belədir: İdxal: Cari ilin mart ayında Azərbaycan Ermənistandan ilk dəfə olaraq 960 ABŞ dolları dəyərində mal idxal edib. İxrac: 2026-cı ilin yanvar-mart ayları ərzində Azərbaycandan Ermənistana 5,757 milyon ABŞ dolları dəyərində məhsul göndərilib. Pay nisbəti: Bu ixrac əməliyyatı Azərbaycanın ümumi ixrac portfelinin 0,11 faizini təşkil edir.
Bu iqtisadi hərəkətlilik regionda nəqliyyat dəhlizlərinin diversifikasiyası və gələcək sülh müqaviləsinin yaratdığı yeni reallıqlar fonunda baş verir. Uzun illərdir sıfır səviyyəsində olan ticarət əlaqələrinin rəsmiləşməsi bölgədə sabitliyin və iqtisadi inteqrasiyanın sürətlənməsinə xidmət edə bilər.
Ruslan Məmmədov
