Avropa ölkələrində ən yüksək aylıq ümumi (brüt) minimum əməkhaqqı 2 771 avro ilə Lüksemburqda qeydə alınıb. Avropa İttifaqı (Aİ) ölkələri arasında isə ən aşağı minimum əməkhaqqı 620 avro ilə Bolqarıstandadır. Avropa İttifaqına (Aİ) namizəd ölkələr də nəzərə alındıqda, ən aşağı göstərici 169 avro ilə Ukraynaya məxsusdur.
Minimum əməkhaqqının bölgüsünə nəzər saldıqda, beş ölkədə bu məbləğin 2 000 avrodan yüksək olduğu görünür. Doqquz ölkədə isə minimum əməkhaqqı 1 000–2 000 avro aralığında dəyişir. Bununla belə, bu qrupdakı ölkələrin əksəriyyəti 1 000 avro səviyyəsinə daha yaxındır və yalnız bir ölkədə göstərici 1 500 avronu ötür.
Lüksemburqla yanaşı, ən yüksək minimum əməkhaqqına malik ölkələr sırasında İrlandiya (2 391 avro), Almaniya (2 343 avro), Niderland (2 338 avro) və Belçika (2 234 avro) yer alır. Fransa isə 1 867 avro ilə bu ölkələri izləyir.
Orta qrupda Sloveniya (1 482 avro), İspaniya (1 425 avro), Litva (1 153 avro), Polşa (1 119 avro), Kipr (1 088 avro), Yunanıstan (1 073 avro), Portuqaliya (1 073 avro) və Xorvatiya (1 050 avro) qərarlaşıb.
Siyahının son pillələrində Ukrayna və Moldova yer alır. Bu ölkələrdə minimum əməkhaqqı müvafiq olaraq 169 və 313 avro təşkil edir. Digər bütün ölkələrdə isə minimum əməkhaqqı 500 avrodan yuxarıdır.
Aİ-yə namizəd dörd ölkədə minimum əməkhaqqı Bolqarıstandan daha yüksəkdir. Bunlar Türkiyə (621 avro), Şimali Makedoniya (624 avro), Monteneqro (670 avro) və Serbiyadır (743 avro).
Malta (994 avro), Estoniya (946 avro), Çexiya (923 avro), Slovakiya (915 avro) və Macarıstan (906 avro) isə minimum əməkhaqqının 1 000 avroya yaxın olduğu ölkələr sırasında yer alır.
Günel GÜNTAC
