Şimali Atlantika Alyansının (NATO) Türkiyənin paytaxtı Ankara şəhərində keçirilən sammitində Ukrayna nümayəndə heyətinin əsas hədəfləri və prioritetləri bəlli olub. Ukrayna Prezidenti Volodimir Zelenski ölkəsinin sammit çərçivəsində reallaşdıracağı strateji addımları açıqlayıb.
ELAZ.İNFO xəbər verir ki, Volodimir Zelenskinin sözlərinə görə, Ankara sammitinin gündəliyinə NATO-nun Müdafiə Sənayesi Forumunda iştirak, eləcə də dünya liderləri ilə iyirmiyə yaxın ikitərəfli görüşün keçirilməsi daxildir. Kiyev bu görüşlər zamanı xüsusilə pilotsuz uçuş aparatlarının (PUA) birgə istehsalı və Ukraynaya tədarükü ilə bağlı yeni müqavilələrin imzalanmasını, həmçinin digər tərəfdaş ölkələrlə mühüm müdafiə razılaşmalarının əldə olunmasını planlaşdırır.
Prezident vurğulayıb ki, səfər çərçivəsində xüsusi diqqət Ukraynanın Hava Hücumundan Müdafiə (HHM) sistemlərinin gücləndirilməsinə yönəldiləcək. Ukrayna tərəfi tərəfdaşlarından yalnız yeni müasir HHM sistemlərinin və onlar üçün raketlərin tədarükünü deyil, həmçinin bu sistemlərin Ukrayna ərazisində istehsalı üçün rəsmi lisenziyaların alınmasını da hədəfləyir. Ekspertlər Ankaradakı bu sammitin Ukraynanın hərbi-sənaye potensialının rəqəmsal və texnoloji müstəviyə keçməsində mühüm rol oynayacağını qeyd edirlər.
Ruslan MƏMMƏDOV