UEFA Konfrans Liqasında 2025/2026-cı illər mövsümünə yekun vurulub. Almaniyanın Leypsiq şəhərində keçirilən final qarşılaşmasında İngiltərənin “Kristal Pelas” və İspaniyanın “Rayo Valyekano” klubları üz-üzə gəlib.
ELAZ.İNFO xəbər verir ki, gərgin keçən qarşılaşma London təmsilçisinin 1:0 hesablı minimal qələbəsi ilə başa çatıb. Oyunda yeganə qolu 51-ci dəqiqədə Jan-Filip Mateta rəqib qapısından keçirib. Bu qələbə ilə “Kristal Pelas” öz tarixində ilk dəfə Avrokubok çempionluğu sevinci yaşayıb. Maraqlıdır ki, “Kristal Pelas” əslində ötən mövsüm İngiltərə Kubokunu qazanaraq birbaşa Avropa Liqasında oynamaq hüququ əldə etmişdi. Lakin klubun sahibi, amerikalı Con Tekstorun eyni zamanda Fransanın “Lion” klubuna da sahiblik etməsi UEFA-nın çoxklublu mülkiyyət qaydalarına zidd fəsad yaradıb. Qurumun qərarı ilə “Lion” Avropa Liqasına buraxılıb, İngiltərə təmsilçisi isə Konfrans Liqasına göndərilib. Bu məcburi yerdəyişmə londonlular üçün tarixi uğurla nəticələnib.
Komandanın avstriyalı baş məşqçisi Oliver Qlasner karyerasında ikinci dəfə Avropa miqyaslı titul qazanıb. O, daha əvvəl Almaniyanın “Ayntraxt” klubu ilə Avropa Liqasının qalibi olmuşdu. İspaniya təmsilçisi “Rayo Valyekano” isə tarixində ilk dəfə oynadığı Avrokubok finalında məğlub olaraq gümüş medallarla kifayətlənib.
2021-ci ildə təsis edilən Konfrans Liqasında İngiltərə klublarının üstünlüyü diqqət çəkir. Turnirin turnir cədvəlinə nəzər salsaq, daha əvvəl “Vest Hem” (2023) və “Çelsi” (2025) bu kuboku başı üzərinə qaldırıb. Cari mövsümdə İngiltərə futbolunun Avropadakı hegemonluğu da xüsusi qeyd edilməlidir. Belə ki, daha əvvəl “Aston Villa” Avropa Liqasının qalibi olub, Çempionlar Liqasının finalında isə İngiltərənin “Arsenal” komandası Fransanın PSJ klubu ilə qarşılaşacaq. Əgər “Arsenal” da qalib gəlsə, futbol tarixində cəmi ikinci dəfə bir ölkənin komandaları eyni mövsümdə hər üç Avrokubok rəfəsini fəth etmiş olacaq. (Sonuncu dəfə bu rekordu 1990-cı ildə İtaliya klubları qeydə alıb).
Ruslan MƏMMƏDOV