Dünya mediasının diqqəti Parisdə keçirilən və Ukrayna ordusunun güc nümayişinə çevrilən möhtəşəm hərbi parada yönəlib. Fransanın Milli Bayramı — Bastiliyanın Alınması Günü münasibətilə təşkil olunmuş təntənəli mərasimdə Ukrayna hərbçilərinin keçidi beynəlxalq ictimaiyyətə və xüsusilə də Rusiyaya güclü həmrəylik mesajı olub.
ELAZ.İNFO xəbər verir ki, Parisdə keçirilən hərbi paraddan sonra rəsmi heyət və diplomatik korpus təmsilçiləri Ukrayna əsgərlərinin nümayiş etdirdiyi güc və əzmkarlıqla bağlı böyük qürur hissi keçirdiklərini bəyan ediblər. Xüsusi olaraq qeyd edilib ki, ukraynalı hərbçilərin fransız tərəfdaşları tərəfindən “14 İyul əməliyyatı” adlandırılan paradda və onun hazırlıq mərhələlərində fəal iştirakı böyük bir tarixi hadisədir.
Tədbir çərçivəsində Ukrayna Prezidenti Volodimir Zelenskinin adından “14 İyul əməliyyatı”nda ölkəni layiqincə təmsil edən bütün hərbçilərə və xüsusən də fransız həmkarları ilə birlikdə paradın hava hissəsində uçuşlar həyata keçirərək əsl döyüş qardaşlığı nümayiş etdirən ukraynalı pilotlara xüsusi təşəkkür ifadə olunub:
“Fransa və bütün dünya döyüşçülərimizin möhtəşəm marşını izlədi. Bu marşda hər kəs əsl Ukraynanı — mübarizə aparan, sarsılmaz, güclü və mütləq qalib gələcək bir ölkəni gördü. Bu, qalib döyüşçülərin marşı idi. Göstərdiyiniz peşəkarlığa, cəsarətə və döyüş qardaşlığına görə hər birinizə təşəkkür edirik”.
Fransada olduqları müddətdə ukraynalı hərbi qulluqçular həm Ukraynanın, həm də Fransanın aparıcı media qurumlarına, o cümlədən “Ukrinform”, “TF1”, “France 2” və “Le Figaro”ya geniş müsahibələr veriblər. Müsahibələrdə hərbi xidmət, real döyüş təcrübəsi, beynəlxalq hərbi dəstəyin vacibliyi və Parisi fəth edən tarixi paradda Ukraynanı təmsil etməyin böyük şərəf olduğu vurğulanıb.
Artıq Ukrayna nümayəndə heyətini daşıyan təyyarənin vətənə doğru yola düşdüyü bildirilib.
Ruslan MƏMMƏDOV
