Heydər Əliyev Fondunun vitse-prezidenti Leyla Əliyeva və Arzu Əliyeva Lənkəran rayonuna səfərləri çərçivəsində regionun zəngin mədəni irsi və qədim xalq sənətkarlığı nümunələri ilə yaxından tanış olublar. Səfər zamanı Lənkəranın tanınmış yerli sənətkarlarından birinin yaradıcılıq emalatxanasına başçəkmə baş tutub.
ELAZ.İNFO xəbər verir ki, Leyla Əliyeva və Arzu Əliyeva sənətkarın əl işlərindən ibarət sərgi ilə tanış olub, nümayiş etdirilən unikal sənət nümunələrini böyük maraqla izləyiblər. Bildirilib ki, Lənkəranın qədim tarixi motivlərini və milli naxış elementlərini özündə yaşadan bu yaradıcılıq işləri Azərbaycanın tətbiqi sənətinin regionlarda inkişaf etdirilməsi baxımından xüsusi əhəmiyyət kəsb edir.
Səmimi şəraitdə keçən görüşdə sənətkar öz yaradıcılıq yolu, əl işlərinin hazırlanma texnikası və qədim sənət növlərinin gənc nəslə ötürülməsi istiqamətindəki fəaliyyəti barədə məlumat verib. Heydər Əliyev Fondunun rəhbərliyinə milli mədəniyyətin və xalq sənətkarlarının fəaliyyətinə göstərilən davamlı diqqət və qayğıya görə dərin minnətdarlıq ifadə olunub. Sonda Leyla Əliyeva və Arzu Əliyeva yerli sənətkara gələcək fəaliyyətində uğurlar arzulayıb və xatirə şəkli çəkdiriblər.
Ruslan MƏMMƏDOV