Ceki Çanın həyat fəlsəfəsi: “İnsan hər gün öyrənməyə davam etməlidir”

ELAZ.İNFO xəbər verir ki, bu gün Bakıda olan dünya şöhrətli aktyor, kinorejissor, prodüser, xeyriyyəçi və YUNİSEF-in xoşməramlı səfiri Ceki Çanın illər əvvəl səsləndirdiyi fikirlər yenidən diqqət çəkib.

Döyüş filmlərinin əfsanəsi hesab olunan sənətçi bildirir ki, insan özünü heç vaxt qüsursuz hesab etməməlidir. Onun sözlərinə görə, hər kəs səhv edə bilər və həyat insanın daim öz üzərində işlədiyi, öyrəndiyi bir məktəbdir.

Ceki Çan insanları sahib olduqları nemətlərin qədrini bilməyə çağırır. O hesab edir ki, adi görünən bir çox şey – sabit iş, kiçik də olsa ev, ailə, rahat yuxu və təhlükəsiz həyat – dünyada milyonlarla insanın arzusudur. Müharibə, yoxsulluq və çətinlik içində yaşayan insanlar üçün bu imkanlar böyük dəyər daşıyır.

Məşhur aktyorun həyatında unudulmaz iz buraxan insanlardan biri isə döyüş sənətlərinin əfsanəsi Brüs Li olub.

Ceki Çan xatırlayır ki, gənclik illərində Brüs Linin çəkildiyi filmlərdə kaskadyor kimi iştirak edib. Çəkilişlər zamanı təhlükəli səhnələrdən birində aldığı zərbədən sonra Brüs Li dərhal onun yanına gələrək vəziyyəti ilə maraqlanıb, üzr istəyib və ona özünə inanmağı, məşqləri davam etdirməyi tövsiyə edib.

Aktyorun sözlərinə görə, həmin hadisə ona təkcə peşəkar təcrübə qazandırmayıb, həm də böyük şöhrət sahibi olan bir insanın sadəliyinin və insani münasibətinin nə qədər vacib olduğunu göstərib.

Ceki Çan hesab edir ki, uğur, şöhrət və var-dövlət insanı dəyərli edən əsas meyar deyil. Ən vacib keyfiyyət insanlığını qorumaq, başqalarına hörmətlə yanaşmaq və hər gün daha yaxşı insan olmağa çalışmaqdır.

Məhz bu düşüncə tərzi Ceki Çanı təkcə məşhur aktyor deyil, həm də milyonlarla insan üçün örnək olan şəxsiyyətə çevirən əsas xüsusiyyətlərdən biri hesab olunur.

Günel GÜNTAC