“Xurşidbanu Natəvan” təqaüd proqramının qalibləri mükafatlandırıldı!

21.11.2026

Gənclərin milli-mənəvi dəyərlərə bağlılığının gücləndirilməsi, eləcə də cəmiyyəti narahat edən aktual sosial problemlərin yaradıcı formada işıqlandırılması istiqamətində mühüm layihələr həyata keçirilir. Xüsusilə tələbələrin təhsilə marağının artırılması və onların sosial fəallığının stimullaşdırılması məqsədilə təsis edilən təqaüd proqramları öz bəhrəsini verir.

ELAZ.INFO xəbər verir ki, Dini Qurumlarla İş üzrə Dövlət Komitəsinin tabeliyində Mənəvi Dəyərlərin Təbliği Fondu ilə Azərbaycan İlahiyyat İnstitutunun birgə təşkilatçılığı ilə təsis edilmiş “Xurşidbanu Natəvan” təqaüd proqramı üzrə müsabiqə qaliblərinin mükafatlandırılma mərasimi keçirilib.

Məlumata görə, layihə çərçivəsində Azərbaycan İlahiyyat İnstitutu və Bakı İlahiyyat Kollecində təhsil alan tələbələr tərəfindən “Milli-mənəvi dəyərlər”, “Vətənpərvərlik”, “Erkən nikah”, “Təhsildən yayınma”, “Ailədə zorakılıq”, “Zərərli vərdişlər” və “Ekoloji məsuliyyət” kimi aktual mövzuları əhatə edən maarifləndirici videoçarxlar hazırlanıb. Müsabiqə komissiyası tərəfindən yüksək qiymətləndirilən layihə müəlliflərinə müvafiq mükafatlar və təqaüdlər təqdim olunub.

Ruslan MƏMMƏDOV

👁 220