Ukrayna Rusiyanın neft sənayesinə zərbələri artırır: Moskvanın emal gücünün yarısından çoxu sıradan çıxıb
ELAZ.İNFO xəbər verir ki, Ukrayna-Rusiya müharibəsində enerji infrastrukturu yenidən əsas hədəflərdən birinə çevrilib. Kiyev Rusiyanın neft emalı gücünün yarıdan çoxunun Ukraynanın uzaqmənzilli zərbələri nəticəsində sıradan çıxdığını açıqlayıb.
Ukrayna tərəfinin məlumatına görə, Rusiya ərazisindəki bir sıra neft emalı obyektlərinə endirilən zərbələr nəticəsində ölkənin emal gücünün 51 faizi müvəqqəti olaraq fəaliyyət qabiliyyətini itirib.
Hədəflər arasında Moskva, Yaroslavl, Ust-Luqa və Perm kimi ərazilərdə yerləşən obyektlərin olduğu bildirilir.
Yanacaq bazarına təsir
Zərbələrin nəticələri artıq yanacaq bazarında da hiss olunur. AP-nin məlumatına görə, Rusiyada bəzi bölgələrdə benzin çatışmazlığı yaranıb, satışlara məhdudiyyətlər tətbiq edilib və dizel istehsalında azalma qeydə alınıb.
Rusiya Prezidenti Vladimir Putin də neft emalı obyektlərinə hücumların iqtisadi təsir göstərdiyini bildirib və bunun ölkə iqtisadiyyatına təxminən 1 faiz təsir etdiyini deyib.
Kiyev isə bu hücumları Rusiyanın hərbi logistikasına və iqtisadi imkanlarına təzyiq vasitəsi kimi təqdim edir.
Digər tərəfdən, Rusiya da Ukrayna ərazisinə genişmiqyaslı hava zərbələrini davam etdirir. Beləliklə, enerji infrastrukturu hər iki tərəfin qarşılıqlı təzyiq mexanizmlərindən birinə çevrilib.
Enerji obyektlərinə hücumların davam etməsi yalnız iki ölkənin yanacaq bazarına deyil, dünya enerji qiymətlərinə də təsir göstərə biləcək risk yaradır.
İlahə BAYINDIR
