Masallı rayonunun sosial-iqtisadi inkişafı və kəndlərin abadlaşdırılması proqramı çərçivəsində növbəti layihə Çayqıraq kəndində icra olunur. Kənd sakinlərinin uzun müddətdir gözlədiyi yeni parkın salınması işləri artıq sürətləndirilib.
ELAZ.İNFO xəbər verir ki, Masallı rayon İcra Hakimiyyətinin başçısı Araz Əhmədov və hüquq-mühafizə orqanlarının rəhbərləri parkın salınacağı əraziyə baxış keçiriblər. İndi kənd yerlərində park salınmasını sadəcə ağac əkilməsi kimi görənlər bir məqama diqqət etsinlər ki, bu layihə həm kəndin estetik görünüşünü dəyişəcək, həm də sakinlər üçün şəhər standartlarına uyğun müasir istirahət zonası yaradacaq.
Bədəlan kənd inzibati ərazi dairəsi üzrə nümayəndə Mətanət Paşayeva layihənin detalları barədə məlumat verərək bildirib ki, parkda aşağıdakı işlərin görülməsi nəzərdə tutulur:
Yaşıllıq zolaqları: Ərazi tamamilə yaşıllaşdırılacaq və dekorativ ağaclar əkiləcək; İnfrastruktur: Müasir oturacaqlar quraşdırılacaq və gecə işıqlandırma sistemi qurulacaq; Əyləncə: Uşaqların asudə vaxtı üçün xüsusi oyun və əyləncə guşələri yaradılacaq.
Rayon İcra Hakimiyyətinin başçısı Araz Əhmədov tikinti və abadlıq işlərinin keyfiyyətinə xüsusi diqqət yetirilməsini tapşırıb. O vurğulayıb ki, bu cür layihələr əhalinin rifahının yüksəldilməsinə və kəndlərimizin müasirləşməsinə xidmət edir. Parkın ən qısa zamanda sakinlərin istifadəsinə verilməsi üçün aidiyyəti qurumlara konkret göstərişlər verilib.
Ruslan Məmmədov
