Azərbaycanın kənd təsərrüfatı ixracında milyardlıq göstərici

ELAZ.İNFO xəbər verir ki, Azərbaycanın qeyri-neft ixracında kənd təsərrüfatının çəkisi artır. Ötən il ölkədən 1 milyard 108,9 milyon dollar dəyərində kənd təsərrüfatı məhsulu ixrac edilib. Bu, 2024-cü illə müqayisədə 18,5 faiz çoxdur.

Xarici bazarlara ən çox pomidor, fındıq, mahlıc pambıq, xurma və alma çıxarılıb. Bu məhsullar Azərbaycanın aqrar ixracında əsas mövqeləri qoruyur.

Kənd təsərrüfatının ixrac potensialı həm də qeyri-neft sektorunun şaxələndirilməsi baxımından diqqət çəkir. Aqrar məhsulların xarici bazarlarda satışının genişlənməsi kənd təsərrüfatında istehsal, emal və logistika imkanlarının artırılmasını da gündəmə gətirir.

Beləliklə, aqrar sektor artıq yalnız daxili ərzaq tələbatının ödənilməsi ilə deyil, ölkəyə valyuta gətirən əsas qeyri-neft istiqamətlərindən biri kimi də çıxış edir.

Günel GÜNTAC