Sabirabadda dəhşətli qəza: Bir nəfər öldü, üç nəfər xəstəxanaya yerləşdirildi

ELAZ.İNFO xəbər verir ki, Sabirabadın Osmanlı kəndi ərazisində baş verən ağır yol qəzası bir insanın həyatına son qoyub. İki avtomobilin toqquşması nəticəsində hadisə yerində bir nəfər ölüb, üç nəfər isə müxtəlif dərəcəli xəsarətlər alaraq xəstəxanaya çatdırılıb.

Hadisə sentyabrın 24-də baş verib. İlkin məlumata görə, Oktay Qasımovun idarə etdiyi “Hyundai” qarşı istiqamətdə hərəkətdə olan Rahim İbrahimovun idarə etdiyi “VAZ-2106” markalı avtomobillə toqquşub.

Zərbənin ağırlığı “VAZ-2106”nın sürücüsü Rahim İbrahimov üçün faciəvi nəticələnib. O, aldığı xəsarətlərdən hadisə yerində həyatını itirib.

“Hyundai”nin sürücüsü Oktay Qasımov və avtomobildə olan sərnişinlər Kamal Mövsüm oğlu Qədirli ilə Mirəli Seyidhəşim oğlu Əskərov isə xəsarət alıblar. Yaralılar xəstəxanaya yerləşdirilib və onların vəziyyəti ilə bağlı əlavə məlumat verilməyib.

Hadisə ilə bağlı Cinayət Məcəlləsinin müvafiq maddəsi əsasında cinayət işi başlanılıb. Hazırda qəzanın hansı şəraitdə baş verdiyi, toqquşmaya nələrin səbəb olduğu və digər hallar araşdırılır.

İslam MAHMUDOV