Kollektiv Təhlükəsizlik Müqaviləsi Təşkilatı Liderləri Ermənistanın Üzvlüyü İlə Bağlı Qərar Verə Bilər

Cənubi Qafqazda dəyişən geopolitika və təhlükəsizlik arxitekturası fərqli hərbi-siyasi bloklar daxilində ciddi böhranlara yol açmaqdadır. Xüsusilə İrəvan rəhbərliyinin Kollektiv Təhlükəsizlik Müqaviləsi Təşkilatı (KTMT) ilə münasibətləri dondurması və üzvlük öhdəliklərindən imtina etməsi təşkilat daxilində yekun qərarların verilməsini zəruri edir.

ELAZ.INFO xəbər verir ki, KTMT-nin baş katibi Taalatbek Masadıqov dövlət başçılarının noyabrın 11-də keçiriləcək Kollektiv Təhlükəsizlik Şurasının sessiyasında Ermənistanın təşkilatdakı üzvlüyü məsələsinə baxa biləcəyini bəyan edib. Baş katib qeyd edib ki, İrəvanın qurumdan çıxması məsələsi Şuranın iclas gündəliyinə salınarsa, bu addım gerçəkləşə bilər. Masadıqov vurğulayıb ki, Ermənistan üzvlük haqqını ödəmədiyinə və kvota dərəcələrinə uyğun kadrlar təyin etmədiyinə görə faktiki olaraq KTMT Nizamnaməsinin 25-ci maddəsinə əsasən səs hüququnu itirib. Baş katibin sözlərinə görə, İrəvanın iclaslarda rəsmi iştirak etməməsinə baxmayaraq, onun daimi nümayəndəsi həftəlik toplantılara qatılaraq müzakirə olunan məsələləri izləyir.

Kollektiv Təhlükəsizlik Şurasının növbəti sessiyası noyabrın 11-də Moskvada keçiriləcək. Ermənistanın baş naziri Nikol Paşinyan daha əvvəl parlamentdəki çıxışında respublikanın KTMT-dən kənarlaşdırılmasının tərəfdarı olduğunu və quruma marağın tükəndiyini bildirmişdi. İrəvan rəhbərliyi 2024-cü ildən təşkilatdakı iştirakını dondurduğunu və münasibətlərin geri dönməz nöqtəyə çatdığını bəyan edib.

Ruslan MƏMMƏDOV