ELAZ.İNFO xəbər verir ki, Azərbaycan Prezidenti İlham Əliyev və Ermənistanın Baş naziri Nikol Paşinyanın Bişkekdə görüşü artıq təkcə növbəti diplomatik təmas kimi qiymətləndirilə bilməz. Görüşün məzmununda diqqət çəkən əsas məqam tərəflərin münasibətləri yalnız siyasi razılaşmalar çərçivəsində deyil, praktiki əməkdaşlıq istiqamətində də inkişaf etdirməsidir.
Tərəflər sərhədlərin delimitasiyası, ticarət, enerji, nəqliyyat və TRIPP marşrutu üzrə gələcək addımları müzakirə ediblər. Azərbaycan Prezidentinin rəsmi məlumatında üçüncü ölkələrdən Ermənistana Azərbaycan ərazisindən taxıl və digər yüklərin tranziti, Azərbaycandan Ermənistana neft məhsullarının ixracı və biznes əlaqələrinin inkişafı xüsusi qeyd olunur.
Burada əsas dəyişiklik budur: sülh prosesinin nəticəsi artıq yalnız siyasi sənədin imzalanması ilə ölçülmür. Əgər iki ölkə arasında yük daşınması, enerji əlaqəsi, ticarət və nəqliyyat baş verirsə, siyasi razılaşma iqtisadi reallığa çevrilməyə başlayır.
Bu baxımdan Bişkek görüşünün ən mühüm nəticəsi yeni bir sənəddən daha çox, mövcud siyasi xəttin davam etdirilməsidir.
İlahə BAYINDIR
