Ölkə mətbuatında və sosial şəbəkələrdə uşaqpulu ətrafında gedən müzakirələr yeni bir qalmaqalla alovlanıb. Bir müddətdir cəmiyyətin əsas tələblərindən biri olan bu sosial müavinət növü barədə millət vəkilinin səsləndirdiyi fikirlər vətəndaşların kəskin etirazına səbəb olub.
ELAZ.İNFO xəbər verir ki, Milli Məclisin deputatı, Ana Vətən Partiyasının sədri Günay Ağamalı ARB TV-də yayımlanan “Günə doğru” verilişində uşaqpulu məsələsinə toxunub. Deputat çıxışı zamanı ölkəmizdə uşaqpulunun geniş müzakirəsinin olmadığını iddia edib. “Dövlətdən nəsə gözləməli deyillər” Millət vəkilinin canlı efirdə ailələrin uşaq dünyaya gətirməsi və dövlət dəstəyi ilə bağlı səsləndirdiyi fikirlər birmənalı qarşılanmayıb:
“Ailələr uşaq dünyaya gətirəndə düşünməməlidirlər ki, mən bu gün uşaq dünyaya gətirirəm və bunun qarşılığında dövlətdən nəsə gözləməliyəm. Bəs düşünmüsünüz ki, uşaqpulu məsələsi bu gün gündəliyə gələrsə və tətbiq olunarsa, valideynlərdə asılılıq və tənbəllik yarada bilər? Yəni insanlar fikirləşəcəklər ki, dövlət mənə uşaqpulu verir, mən artıq işləməyim. İnsanları bu şəkildə əməyə alışdırmaq lazımdır”, — deyə Günay Ağamalı bildirib.
Veriliş yayımlandıqdan dərhal sonra deputatın bu açıqlaması sosial şəbəkələrin Azərbaycan seqmentində geniş və kəskin müzakirələrə yol açıb. İstifadəçilər, ictimai fəallar və sıravi vətəndaşlar millət vəkilini sərt şəkildə qınayıblar. İnternet məkanında edilən etirazlarda əsasən aşağıdakı məqamlar vurğulanır:
Sakinlər millət vəkilinin seçildiyi xalqın deyil, tamamilə fərqli maraqların tərəfində dayandığını iddia ediblər. Sosial şəbəkə istifadəçiləri qeyd ediblər ki, deputatın bu sözləri onun Azərbaycan ailələrinin real sosial-iqtisadi vəziyyətindən, uşaq böyütməyin xərclərindən (baxça, məktəb, geyim, qida, tibbi xərclər) tamamilə xəbərsiz olduğunu göstərir. Vətəndaşlar uşaqpulunun bir sosial təminat və gələcək nəslə investisiya olduğunu, bunun insanları tənbəlliyə deyil, əksinə, sosial rifaha yönləndirdiyini bildirərək deputatın işlətdiyi ifadələri təhqiramiz adlandırıblar.
Məsələ ilə bağlı hələ ki, millət vəkili və ya partiya tərəfindən sosial şəbəkələrdəki bu kəskin reaksiyalara qarşı əlavə bir açıqlama verilməyib.
Ruslan MƏMMƏDOV