Bakıda caz günləri: Festival paytaxtın musiqi gündəmini dəyişib

ELAZ.İNFO xəbər verir ki, Bakıda XXI Caz Festivalı davam edir. Oktyabrın 3-də başlayan festival ayın 11-dək davam edəcək və proqramda 12-dən çox ölkədən musiqiçilər iştirak edir.

Festivalın açılışında Rain Sultanov Qara Qarayev adına Dövlət Kamera Orkestri ilə, İsfar Sarabski isə öz proqramı ilə səhnəyə çıxıb. Fransanın “FR33 ROOTS” qrupu da ilk günün iştirakçıları arasında olub.

Bu il tədbir yalnız konsertlərlə məhdudlaşmır. Proqramda film nümayişləri, müzakirələr, ustad dərsləri və jam-sessionlar da yer alır. Festivalın son iki günündə isə konsertlərin İçərişəhərdə, Qız qalası yaxınlığında açıq havada keçirilməsi nəzərdə tutulub.

Beləliklə, Bakı bir həftə ərzində yerli və xarici caz ifaçılarının görüş məkanına çevrilib. Festivalın proqramı həm peşəkar musiqiçilər, həm də cazla maraqlanan geniş auditoriya üçün müxtəlif formatlar təqdim edir.

Günel GÜNTAC