Bakıda peşə təhsilinin inkişafı və gənc kulinarların beynəlxalq arenaya çıxışı istiqamətində mühüm addım atılıb. “WorldSkills Azerbaijan” tərəfindən təşkil olunan aşpazlıq üzrə milli yarış öz qalibini müəyyən edib.
ELAZ.İNFO xəbər verir ki, Turizm və Sosial Xidmətlər üzrə Bakı Dövlət Peşə Təhsil Mərkəzində keçirilən yarış gərgin mübarizə ilə yadda qalıb. İndi aşpazlığı sadəcə yemək hazırlamaq hesab edənlər bir məqama diqqət etsinlər ki, “Live Cooking Competition” formatında keçirilən bu yarışda iştirakçılar 180 dəqiqə ərzində həm sürət, həm texnika, həm də beynəlxalq standartlara uyğun təqdimat bacarıqlarını nümayiş etdirməli idilər.
Yarışın nəticələrinə görə, bütün rəqiblərini qabaqlayan Cavid Məmmədov I yerə layiq görülüb. Bu qələbə ona Azərbaycanı 2026-cı ildə Çində keçiriləcək möhtəşəm “WorldSkills Shanghai 2026” olimpiadasında təmsil etmək hüququ qazandırıb. Qeyd edək ki, “WorldSkills” hərəkatı qlobal standartların təhsil sisteminə inteqrasiyasını təmin edən və peşə bacarıqlarını dünya səviyyəsində qiymətləndirən ən nüfuzlu platformadır. Bu cür uğurlar Azərbaycan mətbəxinin müasir trendlərlə birləşərək dünyada daha geniş tanıdılması üçün böyük fürsətdir.
Ruslan Məmmədov
