Azərbaycan və Rusiya Şimal-Cənub Dəhlizinin gələcəyini müzakirə etdi
ELAZ.İNFO xəbər verir ki, Azərbaycanla Rusiya arasında nəqliyyat gündəliyinin əsas mövzularından biri yenidən Şimal-Cənub Dəhlizi olub. Tərəflər yükdaşımaların artırılması, sərhəd-keçid məntəqələrinin işinin yaxşılaşdırılması və iki ölkə arasında ticarət əlaqələrinin genişləndirilməsi məsələlərini müzakirə ediblər.
Müzakirələr Azərbaycan Baş nazirinin müavini Şahin Mustafayevlə Rusiyanın Baş nazirinin müavini Aleksey Overçukun görüşündə aparılıb. Görüş iki ölkə arasında iqtisadi əməkdaşlıq üzrə hökumətlərarası komissiyanın həmsədrləri səviyyəsində keçirilib.
Gündəlik yalnız nəqliyyatla məhdudlaşmayıb. Tərəflər ticarət, investisiya, sənaye, energetika, kənd təsərrüfatı və logistika sahələrində əməkdaşlığın vəziyyətini də nəzərdən keçiriblər.
Xüsusi diqqət yükdaşımaların həcminin artırılmasına və sərhəd-keçid məntəqələrinin fəaliyyətinin təkmilləşdirilməsinə yönəlib.
Dəhlizin əhəmiyyəti artır
Şimal-Cənub Beynəlxalq Nəqliyyat Dəhlizi Azərbaycan üçün həm regional tranzit imkanlarının genişləndirilməsi, həm də Şimal və Cənub bazarları arasında bağlantının gücləndirilməsi baxımından mühüm nəqliyyat xəttidir.
Azərbaycan və Rusiya tərəfləri həmçinin daha əvvəl dövlət başçıları səviyyəsində əldə olunmuş razılaşmaların icrasını müzakirə ediblər.
Növbəti mərhələdə əsas məsələ yalnız siyasi razılaşmaların mövcudluğu deyil, dəhliz üzrə real yük axınının artırılması, logistikanın sürətləndirilməsi və sərhəddə yaranan texniki maneələrin minimuma endirilməsi olacaq.
Tərəflərin son görüşü də göstərir ki, Azərbaycan-Rusiya iqtisadi gündəliyində nəqliyyat və logistika istiqaməti xüsusi yerini qoruyur.
İlahə BAYINDIR
