Müasir hip-hop mədəniyyətinin və rəqəmsal platformalar vasitəsilə parlayan yeni nəsil musiqinin ən parlaq nümayəndələrindən biri Rusiya paytaxtında pərəstişkarlarının qarşısına çıxmağa hazırlaşır. Qərb repinin trendlərini müəyyən edən ifaçının bu möhtəşəm şousu musiqi dünyasında böyük maraqla gözlənilir.
ELAZ.İNFO xəbər verir ki, tanınmış amerikalı repçi Lil Pump avqustun 22-də Moskvadakı “VK Stadium” arenasında Rusiyada ilk genişmiqyaslı solo konsertini verəcək. Bu barədə TASS agentliyinə layihənin təşkilatçısı olan “Force Events” agentliyindən məlumat verilib.
Təşkilatçıların yaydığı rəsmi məlumatda qeyd olunur: “Avqustun 22-də ‘VK Stadium’ meydançasında 2010-cu illərin Qərb hip-hopunun əfsanəsi sayılan Lil Pump-ın böyük konserti baş tutacaq”. İfaçının daha əvvəl də Rusiyada qonaq olduğu, yerli musiqiçilərlə əməkdaşlıq etdiyi və rusiyalı dinləyicilərə hər zaman xüsusi rəğbət bəslədiyi bildirilir. Lakin budəfəki gəliş onun ölkədəki ilk böyük və rəsmi klub şousu kimi tarixə düşəcək.
Həqiqi adı Qazzi Qarsiya olan Lil Pump 2010-cu illərin ortalarında “SoundCloud” platformasından səmərəli istifadə edərək musiqi karyerasında kəskin dönüş yaradan və böyük səs-küyə səbəb olan ilk gənc ifaçılardan biridir. Onun debüt albomu məşhur “Billboard 200” hit-paradında 3-cü pilləyə qədər ucalıb, ifaçıya dünya şöhrəti qazandıran “Gucci Gang” treki isə qlobal musiqi hitinə çevrilib.
Ruslan MƏMMƏDOV