2026-cı il FİFA Dünya Çempionatı ərəfəsində Almaniya yığmasının gənc futbolçuları ön plana çıxmağa başlayıblar. “Bayern”in ulduzları Camal Musiala (23 yaş) və Lennart Karl (18 yaş), həmçinin “Liverpul”un vingeri Florian Virtsin (23 yaş) mərkəz hücumçusunun arxasında əsas heyət oyunçularına çevrilməsi azarkeşlərin böyük həyəcanına səbəb olub.
ELAZ.INFO xəbər verir ki, məşq prosesindən əldə olunan təəssüratlara əsasən, baş məşqçi Yulian Nagelsmannın bu gənc üçlüyü bazar günü Finlandiyaya qarşı keçiriləcək yoldaşlıq görüşündə sınaqdan keçirəcəyi gözlənilir. Mediada bu gənclərin “sehrli üçbucaq” yaratdığı barədə müzakirələr getdiyi bir vaxtda, 38 yaşlı alman mütəxəssis onların sürətini və universallığını yüksək qiymətləndirib. Nagelsmann bildirib ki, yeni gələnlər arasında ən böyük irəliləyişə Lennart Karl nail olub. Hersoqenauraxdakı təlim-məşq düşərgəsində Musiala və Virts də məşqçinin daimi mənəvi dəstəyini hiss edirlər.
“Arsenal”ın heyətində UEFA Çempionlar Liqasının finalında PSJ-yə qarşı oynayacaq Kay Havertz müvəqqəti olaraq düşərgədə olmadığı üçün, “Nyukasl”ın hücumçusu Nik Voltemadenin bu sürətli və yaradıcı üçlüyün önündə mərkəz hücumçusu vəzifəsini yerinə yetirəcəyi bildirilir. Taktiki plana əsasən, Virts sol cinahda, Karl sağ cinahda, Musiala isə mərkəzdə mövqe tutacaq. Hər üç oyunçu sürətli olduğu və boş sahələr yaratdığı üçün oyun zamanı mövqe dəyişikliklərinə tam sərbəstlik verilib.
Keçən yay ağır zədə alan və aylarla futboldan uzaq qalan Camal Musiala haqqında danışan Nagelsmann onun komanda üçün əvəzolunmaz olduğunu vurğulayıb: “Camal digər futbolçuların çoxunda olmayan keyfiyyətlərə malikdir. O, hətta 70 faiz gücü ilə oynasa belə, bir çoxlarından daha yaxşıdır”. Baş məşqçi Almaniya millisinin iyunun 14-də Hyustonda Kurasao yığmasına qarşı keçiriləcək Dünya Çempionatının ilk oyununadək Musialanın tam hazır olmasını hədəflədiklərini bildirib.
“Bayern” ilə yerli çempionatda “qızıl dubl” etdikdən sonra diqqətləri üzərinə çəkən 18 yaşlı Lennart Karl, Musiala və Virts ilə yanaşı Almaniyanın bu turnirdəki ən böyük sürprizi hesab olunur. Nagelsmann onun turnir öncəsi keçiriləcək Finlandiya və ABŞ (6 may, Çikaqo) oyunlarında özünü sübut etmək şansının olduğunu qeyd edib. Gənc oyunçunun meydandakı özünəinamını bəyənən məşqçi, onun komandaya böyük hörmət və fədakarlıqla qoşulduğunu əlavə edib.
Ruslan MƏMMƏDOV