Bu yay keçiriləcək Dünya Çempionatının Boston oyunları ətrafında böyük qalmaqal yaranıb. Massaçusets ştatının kiçik bir şəhəri təhlükəsizlik xərcləri ödənilməyəcəyi təqdirdə turniri bloklamaqla hədələyir.
ELAZ.İNFO xəbər verir ki, sənədlərdə “Boston oyunları” kimi qeyd olunsa da, əslində 7 qarşılaşma şəhər mərkəzindən 20 mil uzaqlıqda yerləşən Foksboro (Foxborough) şəhərindəki “Gillette Stadium”da keçirilməlidir. Lakin şəhər rəhbərliyi milyonlarla dollarlıq xərcləri qarşılamaq iqtidarında olmadıqlarını bəyan edib.
Foksboro rəsmilərinin bildirdiyinə görə, oyunlar zamanı asayişin qorunması, polis xidməti və digər ictimai təhlükəsizlik tədbirləri üçün 7.8 milyon dollar vəsait tələb olunur. Şəhərin büdcəsi isə bu yükü qaldıra bilmir. Yerli rəsmilər kəskin ultimatumla çıxış ediblər: “Əgər kimsə bu xərcləri öz üzərinə götürməsə, biz oyunların keçirilməsinə icazə verməyəcəyik. Şəhər sakinləri qlobal bir turnirin maliyyə yükünü öz çiyinlərində daşımalı deyil.”
Sözügedən stadion həm də NFL komandası “New England Patriots”un ev sahibidir. Oyunların başqa bir məkana köçürülməsi və ya maliyyənin kim tərəfindən (ştat hökuməti, yoxsa FİFA) qarşılanacağı hələlik qeyri-müəyyən olaraq qalır. Əgər tərəflər razılığa gələ bilməsələr, bu, Dünya Çempionatının təşkilatçılıq tarixinə böyük bir uğursuzluq kimi düşə bilər.
Ruslan MƏMMƏDOV
