Moskvanın Xalq Təsərrüfatı Nailiyyətləri Sərgisində (VDNX) Rusiyanın ən böyük musiqi hadisələrindən biri olan “VK Fest” festivalının birinci günü möhtəşəm konsert proqramı ilə başa çatıb. Gənclərin sevimli ifaçıları və populyar musiqiçilər paytaxt sakinlərinə unudulmaz anlar yaşadıblar.
ELAZ.İNFO xəbər verir ki, festivalın ilk günündə Markul, Boulevard Depo və Dora kimi məşhur rep və pop ifaçıları öz hitlərini səsləndiriblər. Tədbirin ən böyük sürprizi isə festivalın “gizli qonağı” olan gənc ulduz Vanya Dmitrienkonun səhnəyə çıxması olub. Musiqili proqramın açılışını Tatyana Kurtukova edib. O, dinləyicilərin rəğbətini qazanmış kompozisiyaları ilə yanaşı, Rusiya Federasiyasının Dövlət Himnini də ifa edib. Festival çərçivəsində səhnə alan digər populyar artistlər arasında bu adlar yer alıb:
Zivert, AK-47 və Tgk, Aarne, Big Baby Tape, Toxi$, Eva Polna, Jony. Musiqi ilə yanaşı, festivalın maarifləndirici platforması olan “Lektorium” məkanında da izdiham yaşanıb. Burada Rusiya Federasiyasının əməkdar artisti Maksim Matveyevlə maraqlı görüş keçirilib. Aktyor festival qonaqları ilə birlikdə kinoda süni intellektin rolu və psixoterapiya mövzularına toxunub, həmçinin çəkildiyi yeni “Qara ipək” (Çornıy şolk) filmi barədə eksklüziv detalları bölüşüb.
Ənənəvi olaraq “VK Fest” bir neçə tematik zonaya bölünüb: “Ailə”, “İdman”, “Yaradıcılıq”, “Əyləncə”, “Video oyunlar zonası”, “Texnologiyalar”, “Kospley”, “Media” və “Fudkort” (Qida zonası). Qeyd edək ki, 2026-cı ilin festival turnesi çərçivəsində tədbir artıq Kazan, Nijni Novqorod və Sankt-Peterburq şəhərlərində uğurla reallaşıb.
ELAZ.İNFO
