ELAZ.İNFO xəbər verir ki, Ukrayna müharibəsinin dayandırılması istiqamətində diplomatik səylər yenidən intensivləşib. ABŞ nümayəndələrinin həm Kiyev, həm də Moskva ilə keçirdiyi görüşlərdən sonra danışıqlar prosesinin bərpası ehtimalı gündəmə gəlib.
Ukrayna Prezidenti Volodimir Zelenski ABŞ nümayəndələrinin təqdim etdiyi bəzi təklifləri müsbət qiymətləndirib. Tərəflər arasında hələlik konkret razılaşma əldə olunmasa da, növbəti görüşlərin keçirilməsi üçün müxtəlif variantlar müzakirə olunur.
Danışıqlarda enerji infrastrukturu, taxıl daşımaları və hərbi əsirlərin dəyişdirilməsi kimi məsələlərin önə çıxa biləcəyi bildirilir.
ABŞ və Rusiya prezidentləri arasında telefon danışığında da müharibənin mümkün qədər tez başa çatdırılması və gələcəkdə ikitərəfli münasibətlərin bərpası məsələləri müzakirə olunub.
Bununla belə, diplomatik prosesin qarşısında ciddi maneələr qalır. Ərazi məsələsi, təhlükəsizlik zəmanətləri və müharibədən sonrakı siyasi düzən üzrə tərəflərin mövqeləri hələ də bir-birindən əhəmiyyətli dərəcədə fərqlənir.
Ona görə də hazırkı mərhələni sülh razılaşmasına yaxınlaşmadan daha çox, danışıqlar kanalının yenidən açılması kimi qiymətləndirmək mümkündür.
İlahə BAYINDIR
