Narkotik vasitələrdən istifadə təkcə bir insanın həyatını dəyişmir. Bu problem ailələrin dağılmasına, gənclərin gələcəyinin məhv olmasına və cəmiyyətin sağlam inkişafına ciddi zərbə vurur. Məhz buna görə narkomaniya ilə mübarizə yalnız hüquq-mühafizə orqanlarının üzərinə düşən vəzifə deyil, hər bir vətəndaşın diqqət və məsuliyyət tələb edən ümumi məsələsidir.
Azərbaycanda narkomaniya ilə mübarizə istiqamətində ardıcıl tədbirlər həyata keçirilir. Rəsmi statistikaya əsasən, ölkədə 32 mindən çox narkotik istifadəçisi qeydiyyatdadır. Bununla yanaşı, mütəxəssislər qeyd edirlər ki, müxtəlif səbəblərdən müalicə müəssisələrinə müraciət etməyən və rəsmi qeydiyyata düşməyən şəxslər də mövcuddur. Bu səbəbdən faktiki istifadəçilərin sayının rəsmi statistikadan daha yüksək ola biləcəyi ehtimal edilir. Lakin bununla bağlı dəqiq və təsdiqlənmiş rəsmi göstərici mövcud deyil.
Son illər hüquq-mühafizə orqanlarının narkotik vasitələrin qanunsuz dövriyyəsinə qarşı keçirdiyi əməliyyatlar göstərir ki, bu təhlükəyə qarşı mübarizə fasiləsiz davam etdirilir. Hər il külli miqdarda narkotik vasitə qanunsuz dövriyyədən çıxarılır, mütəşəkkil cinayətkar qruplar zərərsizləşdirilir və qanunsuz dövriyyə ilə məşğul olan şəxslər məsuliyyətə cəlb olunurlar.
Lakin problemin tam həlli yalnız hüquqi tədbirlərlə mümkün deyil. Mütəxəssislər hesab edirlər ki, maarifləndirmə işinin gücləndirilməsi, ailə institutunun möhkəmləndirilməsi, məktəblərdə profilaktik tədbirlərin genişləndirilməsi və gənclərin sağlam həyat tərzinə təşviq olunması narkomaniyaya qarşı mübarizədə mühüm rol oynayır.
Xüsusilə yeniyetmə və gənclərin asudə vaxtının səmərəli təşkili, idman və mədəni fəaliyyətlərə cəlb edilməsi, psixoloji dəstək proqramlarının genişləndirilməsi bu istiqamətdə mühüm əhəmiyyət daşıyır. Çünki narkotik asılılığının qarşısını almağın ən təsirli yolu onun yaranmasına imkan verməməkdir.
Hər bir vətəndaş da bu mübarizənin iştirakçısı ola bilər. Qanunsuz narkotik dövriyyəsi və ya istifadəsi ilə bağlı məlumatların aidiyyəti qurumlara çatdırılması, cəmiyyətin bu problemə biganə qalmaması ümumi təhlükəsizliyə mühüm töhfə verir.
Sağlam cəmiyyət sağlam düşüncədən başlayır. Narkomaniyaya qarşı mübarizə yalnız dövlət qurumlarının deyil, ailələrin, təhsil müəssisələrinin, media nümayəndələrinin və bütün cəmiyyətin ortaq məsuliyyətidir. Gələcəyimizi qorumağın ən etibarlı yolu gənc nəslin sağlam, savadlı və təhlükəsiz mühitdə yetişməsinə birgə dəstək verməkdir.
İlahə BAYINDIR
