Qlobal miqyasda müttəfiqlik əlaqələrini gücləndirən Rusiya təbii fəlakətin fəsadları ilə mübarizə aparan Venesuelaya irimiqyaslı humanitar dəstək göstərib. Siyasi və iqtisadi müstəvidə yaxın tərəfdaş olan iki ölkə bu dəfə humanitar missiya çərçivəsində bir araya gəlib.
ELAZ.İNFO xəbər verir ki, Rusiyanın Venesueladakı fövqəladə və səlahiyyətli səfiri Sergey Məlik-Bağdasarov ölkədə baş vermiş son təbii fəlakətin fəsadlarının aradan qaldırılmasına kömək məqsədilə göndərilən rus humanitar yardımının rəsmi təhvil-təslim mərasimində iştirak edib. Mühüm humanitar aksiya “La Karlotta” (La Carlotta) hərbi-hava bazasında baş tutub. Mərasimdə Venesuela Prezidentinin səlahiyyətli nümayəndəsi, vitse-prezident Delsi Rodriqes Qomes (Delcy Rodríguez Gómez), həmçinin ölkə hökumətinin yüksək rütbəli rəsmiləri və aidiyyəti dövlət agentliklərinin nümayəndələri iştirak ediblər.
Rusiya tərəfindən göndərilən və xüsusi reyslə Venesuelaya çatdırılan 35 tonluq yardım paketinin tərkibi zərərçəkənlərin ilkin ehtiyaclarını qarşılamaq üçün qruplaşdırılıb: Qida məhsulları və içməli su; Təxirəsalınmaz tibbi yardım üçün dərman preparatları və müasir tibbi avadanlıqlar; Gündəlik ilkin tələbat malları; Su təchizatının bərpası üçün xüsusi texniki avadanlıqlar; Evsiz qalmış sakinlərin müvəqqəti sığınacaqla təmin olunması üçün xüsusi çadırlar.
Mərasimdə çıxış edən rusiyalı diplomat Sergey Məlik-Bağdasarov bu yardımın sadəcə maddi dəstək deyil, həm də mənəvi həmrəylik rəmzi olduğunu vurğulayıb: “Bugünkü humanitar missiya rus xalqının Venesuela xalqı ilə səmimi həmrəyliyinin aydın nümayişidir. Bu addım Rusiyanın çətin anlarda öz dostlarını heç vaxt tək qoymadığının və hər zaman onlara dayaq olduğunun növbəti sübutudur. Əminəm ki, çatdırılan bu yardımlar qayğıya, diqqətə ən çox ehtiyacı olan insanların yaralarını sarımağa kömək edəcək”. Venesuela hökuməti göstərilən operativ köməyə görə Rusiya rəhbərliyinə və xalqına dərin minnətdarlığını bildirib.
ELAZ.İNFO
