Çinin şimalında yerləşən Tyanqin (Tianjin) İqtisadi-Texnoloji İnkişaf Zonasındakı “FAW-Volkswagen” zavodu ənənəvi avtomobil istehsalı modelini geridə qoyaraq, süni intellekt (AI) əsaslı ağıllı sənaye sisteminə keçid edib. Sürətlə hərəkət edən robot qollar, avtomatlaşdırılmış idarə olunan nəqliyyat vasitələri (AGV) və böyük rəqəmsal ekranlarda parıldayan real vaxt məlumatları zavodun gündəlik mənzərəsinə çevrilib.
ELAZ.İNFO xəbər verir ki, ümumi investisiya həcmi 19,5 milyard yuan (təxminən 2,9 milyard ABŞ dolları) olan və 1,08 milyon kvadratmetr ərazini əhatə edən bu nəhəng müəssisə, illik 240 min avtomobil istehsal etmək gücünə malikdir. 2016-cı ildə tikintisinə başlanılan və cəmi 23 aya tamamlanan zavod, “Volkswagen Group”un dünya üzrə ən sürətli tikilən fabriki kimi tarixə düşüb. “FAW-Volkswagen”in Tyanqin filialının baş direktoru Marek Smıkalın (Marek Smykal) sözlərinə görə, ənənəvi avtomobil istehsalı tamamilə insan təcrübəsinə – mexaniki planlaşdırmaya, gözlə vizual yoxlamalara və sabit vaxt intervallı texniki qulluğa əsaslanırdı. Süni intellekt isə bu onilliklərin modelini kökündən dəyişərək prosesləri daha səmərəli və dəqiq edir.
Hazırda zavodda ştamplama, qaynaq, rəngləmə və yekun montaj sahələrini əhatə edən 105 yüksək dəyərli ağıllı istehsal ssenarisi tətbiq olunur: AI əsaslı planlaşdırma istehsal ritmini sifarişlərə uyğun avtomatik tənzimləyir. Vizual təftiş sistemləri komponentləri millimetr dəqiqliyi ilə yoxlayır, proqnozlaşdırılan texniki qulluq isə nasazlıq baş vermədən problemləri aşkar edir. Yalnız bu sexdə 3000-dən çox iş saatına qənaət edilib. Vizual sistemlər yapışqan qüsurlarını avtomatik müəyyən edir, ağıllı enerji idarəetməsi isə istehsal yükünə uyğun olaraq enerji sərfiyyatını optimallaşdırır. AI vizual tanıma, robot bələdçiliyi və ağıllı seçim texnologiyaları istehsalın səmərəliliyini davamlı olaraq artırır.
Şirkətin rəsmi statistikasına görə, həyata keçirilən bu ağıllı yeniliklər sayəsində ümumi istehsal səmərəliliyi 16 faiz artıb, keyfiyyətlə bağlı qüsurlar 20 faiz azalıb və ümumilikdə 8,52 milyon yuan xərclərə qənaət edilib. Zavod yaxın gələcəkdə həm də ağıllı sürücülük, intellektual kokpitlər və şəbəkəyə qoşulmuş avtomobil texnologiyalarını inkişaf etdirməyi planlaşdırır. Müəssisə rəsmisi Hao Yanfeinin (Hao Yanfei) bildirdiyinə görə, zavod benzin, elektrik və hibrid mühərrikli avtomobilləri əhatə edən çoxşaxəli strategiyanı rəhbər tutaraq yeni nəsil enerji maşınlarına keçidi sürətləndirəcək.
Ruslan MƏMMƏDOV