Rusiya Federasiyası hökuməti istehlakçıların hüquqlarının qorunması və qeyri-qanuni dövriyyənin qarşısının alınması məqsədilə “Çestnıy znak” (Dürüst nişan) sistemində məcburi nişanlanmaya tabe olan malların siyahısını genişləndirib. Bu qərar ölkənin baqqaliye məhsulları bazarında şəffaflığın artırılmasına xidmət edəcək.
ELAZ.İNFO xəbər verir ki, yeni qaydalara əsasən, bir neçə mühüm qida qrupu məcburi markalanma sisteminə daxil edilib. Təsdiqlənmiş qərara əsasən, tətbiq mərhələli şəkildə həyata keçiriləcək: 1 mart 2026-cı il tarixinədək: Müvafiq məhsulların istehsalçıları monitorinq sistemində qeydiyyatdan keçməlidirlər. 1 sentyabr 2026-cı ildən: Səhər yeməyi üçün taxıl məhsulları, bal, makaron məmulatları və tez hazırlanan kartof məhsullarına xüsusi identifikasiya kodlarının vurulması məcburi olacaq. 1 dekabr 2026-cı ildən: Un, un qarışıqları, müxtəlif yarmalar, eləcə də quru şorba və sıyıq qarışıqları üçün nişanlanma tələbi qüvvəyə minəcək.
Mütəxəssislərin fikrincə, bu addım 2030-cu ilə qədər olan dövlət siyasəti strategiyasının tərkib hissəsidir və bazarda saxta məhsulların həcmini minimuma endirməyi hədəfləyir. Nişanlanma sistemi vasitəsilə hər bir alıcı məhsulun mənşəyi və keyfiyyəti barədə məlumatı asanlıqla əldə edə biləcək. Bu yenilik həm yerli istehsalçılar, həm də ixracatçılar üçün yeni logistik və inzibati tələblər formalaşdırır.
Ruslan MƏMMƏDOV
