Son illərdə “eko-frendli” tualet kağızlarına tələbat artsa da, onların ətraf mühitə real təsirləri bir-birindən kəskin fərqlənir. Mütəxəssislər hər bir istehlakçının bilməli olduğu vacib məqamları açıqlayıblar.
ELAZ.İNFO xəbər verir ki, gündəlik istifadə edilən standart tualet kağızları ağac kəsimi, yüksək enerji sərfiyyatı və kimyəvi ağartma prosesləri səbəbindən təbiətə ciddi zərər vurur. Lakin alternativlər də həmişə göründüyü qədər “təmiz” deyil. Environmental Paper Network qeyri-hökumət təşkilatının hesablamalarına görə, əgər təkcə ABŞ-da hər bir vətəndaş cəmi bircə dəfə standart kağız əvəzinə təkrar emal edilmiş liflərdən hazırlanan rulondan istifadə etsə: 1,6 milyon ağac kəsilməkdən xilas olar; 3,8 milyard litr su israfının qarşısı alınar.
Ekoloji təmiz tualet kağızı alarkən iki əsas amil ön plana çıxır: Bu kağızlar təzə kəsilmiş ağaclardan deyil, istifadə olunmuş kağız tullantılarından hazırlanır. Lakin burada “istehlakdan əvvəlki” (istehsal qalıqları) və istehlakdan sonrakı (artıq istifadə olunmuş kağızlar) materiallar arasındakı fərqi bilmək vacibdir. Ənənəvi ağartma prosesində istifadə olunan xlor ətraf mühiti çirkləndirir. Ekoloji məhsullarda isə xlor tərkibli olmayan ağartma texnikalarından istifadə olunur. Britaniya Kolumbiyası Universitetinin professoru Qari Bull bildirir ki, bəzi istehsalçılar artıq bambuk və ya digər sürətlə böyüyən bitkilərə müraciət edirlər. Həmçinin, mütəxəssislər ümumi kağız istifadəsini azaltmaq üçün bide (bidet) sistemlərinin tətbiqini ən effektiv yol hesab edirlər.
Unutmayın ki, ekoloji məhsullar çox vaxt daha baha olsa da, onların uzunmüddətli perspektivdə planetimiz üçün verdiyi fayda ölçülməzdir.
Ruslan MƏMMƏDOV
