Azərbaycan və Ukrayna xalqları arasındakı tarixi dostluq və humanitar həmrəylik növbəti xeyirxah missiya ilə davam etdirilir. Müharibənin ağır fəsadlarından zərər çəkmiş ukraynalı uşaqların reabilitasiyası proqramı çərçivəsində ölkəmizə yeni qrup təşrif buyurub.
ELAZ.İNFO xəbər verir ki, 2026-cı ilin üçüncü qrupu olaraq 29 ukraynalı uşaq və onları müşayiət edən 3 nəfər psixoloji və sağlamlıq reabilitasiyası keçmək üçün Bakıya gəlib. Bu qrupa daxil olan uşaqlar Rusiyanın hərbi müdaxiləsinin ağır nəticələrini yaşamış Çerniqov vilayətinin İvanovo Liseyinin şagirdləridir.
Bu humanitar layihə Ukraynanın Xarici İşlər Naziri Andriy Sibiha və həyat yoldaşı Tetyana Sibihanın təşəbbüsü, həmçinin xeyriyyəçilərin dəstəyi ilə reallaşdırılıb. Uşaqların müharibə travmalarından uzaqlaşması üçün onlara peşəkar tibbi və psixoloji yardım göstəriləcək, eyni zamanda Azərbaycanın zəngin mədəniyyəti və qonaqpərvərliyi ilə tanışlıqları təmin olunacaq. Heydər Əliyev Beynəlxalq Aeroportunda uşaqları Ukraynanın ölkəmizdəki səfirliyinin nümayəndələri və Azərbaycan Milli Məclisinin deputatı, Azərbaycan-Ukrayna parlamentlərarası əlaqələr üzrə işçi qrupunun rəhbəri Əlibala Məhərrəmzadə qarşılayıb. Rusiyanın genişmiqyaslı hücumundan bəri ümumilikdə 545 ukraynalı uşaq Azərbaycanda müalicə və reabilitasiya kursu keçib.
Bu addım sadəcə tibbi yardım deyil, həm də çətin günlərdə Azərbaycanın Ukrayna xalqına göstərdiyi mənəvi dəstəyin və sarsılmaz dostluğun rəmzidir. Uşaqların təhlükəsiz şəraitdə sağalması və normal həyata adaptasiyası üçün hər iki tərəf sıx əməkdaşlıq edir.
Ruslan Məmmədov
