Çin Xalq Respublikasının Sədri Si Cinpin və xanımı Pen Liyuan Koreya Xalq Demokratik Respublikasına (KXDR) etdikləri rəsmi dövlət səfərinin ikinci günündə Pxenyandakı Çin-KXDR Dostluq Abidəsini (Dostluq Qülləsi) ziyarət ediblər.
ELAZ.İNFO xəbər verir ki, yüksək səviyyəli ziyarət zamanı Çin liderini Koreya Fəhlə Partiyasının Baş katibi, KXDR Dövlət İşləri üzrə sədri Kim Çen In və xanımı Ri Sol Cu müşayiət ediblər. Pxenyanda ucalan Dostluq Abidəsi iki ölkənin ortaq hərbi və siyasi keçmişinin simvolu hesab olunur: Bu abidə 1959-cu ildə Koreya müharibəsi (1950–1953) zamanı ABŞ təcavüzünə qarşı döyüşən və Şimali Koreyaya kömək edən Çin Xalq Könüllülərinin xatirəsini əbədiləşdirmək məqsədilə ucaldılıb.
Çin lideri Si Cinpin yeddi il əvvəl KXDR-ə etdiyi əvvəlki dövlət səfəri zamanı da xanımı ilə birlikdə bu abidəni ziyarət edərək çinli şəhidlərin xatirəsini yad etmişdi. KXDR rəhbəri Kim Çen In da mütəmadi olaraq bu qülləni ziyarət edir və çələnglər qoyur. Keçirilən anım mərasimi və liderlərin birgə addımları hər iki ölkənin inqilabi keçmişə olan dərin hörmətini nümayiş etdirir. Ekspertlərin fikrincə, bu cür rəmzi rəsmi addımlar Pekin və Pxenyan arasındakı ənənəvi dostluq münasibətlərinin qorunub saxlanması, eləcə də gələcək nəsillərə ötürülməsinin vacibliyini növbəti dəfə bütün dünyaya bəyan edir.
Ruslan MƏMMƏDOV