İran müharibəsinin və qlobal geosiyasi gərginliklərin təsiri fonunda Neft İxrac Edən Ölkələr Təşkilatı (OPEC) cari il üçün qlobal neft tələbatı ilə bağlı bədbin proqnozunu açıqlayıb.
ELAZ.İNFO xəbər verir ki, OPEC-in bu gün dərc olunmuş aylıq hesabatında 2026-cı il üçün qlobal neft tələbatının artımı proqnozu daha 190 min barrel azaldılaraq gündəlik 780 min barrelə endirilib. Bu, təşkilat tərəfindən ardıcıl olaraq edilən üçüncü aşağıya doğru düzəlişdir. Hesabatda qeyd olunur ki, OPEC-in proqnozları Beynəlxalq Enerji Agentliyi (IEA) kimi digər qurumlarla müqayisədə İran müharibəsinin qlobal istehlaka mənfi təsirlərini daha az qiymətləndirir. Təşkilatın ekspertləri hesab edirlər ki, ilin ikinci yarısında qlobal iqtisadiyyat daha yaxşı performans göstərə bilər və bu səbəbdən 2027-ci il üçün neft tələbatı artımı proqnozu gündəlik 210 min barrel artırılaraq 1,94 milyon barrelə çatdırılıb.
Dünyanın ən mühüm neft marşrutlarından biri olan Hürmüz boğazının aylarla bağlı qalması Yaxın Şərqdə milyonlarla barrel neft hasilatının qarşısını kəsmişdi. ABŞ və İran arasında imzalanmış müvəqqəti sülh sazişindən sonra hasilat bərpa olunmağa başlasa da, regionda yenidən alovlanan hərbi zərbələr gəmiçilik və daşımalarla bağlı narahatlıqları yenidən artırıb. “2026-cı ilin birinci yarısında qlobal iqtisadi artım dinamikası ümumilikdə dayanıqlı qalıb. Geosiyasi gərginliyin potensial olaraq mülayimləşməsi, enerji bazarlarının və ticarət axınlarının daha da sabitləşməsi şərtilə, 2026-cı ilin ikinci yarısında qlobal artım üçün əlavə imkanlar yarada bilər”.
OPEC və Rusiya başda olmaqla onun müttəfiqlərinin daxil olduğu OPEC+ qrupu aprel ayından etibarən hasilatı artırmağa razılaşsa da, Hürmüz boğazının qapanması kvotaların tam yerinə yetirilməsini qeyri-mümkün etmişdi. Hesabatın ikinci dərəcəli mənbələrinə əsasən, Körfəz ölkələrinin müharibə səbəbindən dayandırılmış hasilatı yenidən bərpa etməsi nəticəsində iyun ayında OPEC+ üzrə gündəlik xam neft hasilatı may ayı ilə müqayisədə təxminən 3 milyon barrel artaraq orta hesabla 36,28 milyon barrel təşkil edib.
Ruslan MƏMMƏDOV