ELAZ.İNFO xəbər verir ki, Ermənistanın BMT-nin Məcburi İtmələr üzrə Komitəsinə təqdim etdiyi hesabatla bağlı Azərbaycan vətəndaş cəmiyyəti nümayəndələrinin də alternativ hesabat hazırladığı açıqlanıb.
Məsələ ilə bağlı verilən məlumata görə, Beynəlxalq Avrasiya Mətbuat Fondu (BAMF) Ermənistanın hesabatına alternativ sənəd hazırlayaraq Azərbaycan-Ermənistan münaqişəsi nəticəsində itkin düşmüş şəxslərlə bağlı məsələləri beynəlxalq müstəviyə çıxarıb.
Məlumata əsasən, Ermənistanın növbəti dövri hesabatının BMT-nin Məcburi İtmələr üzrə Komitəsində nəzərdən keçirilməsi gözlənilir. Azərbaycan QHT-ləri isə bu proses çərçivəsində Ermənistanın təqdim etdiyi məlumatlarda azərbaycanlı itkinlərlə bağlı məsələlərin də diqqətdə saxlanılmasını istəyirlər.
BAMF-nin alternativ hesabatı da BMT müstəvisində təqdim olunan sənədlər sırasında yer alıb. Təşkilatın bu istiqamətdə fəaliyyəti yeni deyil. Fond uzun müddətdir Azərbaycan QHT-lərinin beynəlxalq təşkilatlarda təmsilçiliyinin artırılması və beynəlxalq mexanizmlərə alternativ hesabatlar təqdim etməsi istiqamətində layihələr həyata keçirir.
Hazırda Ermənistanın hesabatı ilə yanaşı Azərbaycan tərəfinin təqdim etdiyi alternativ sənədlərin də BMT platformasında görünməsi məsələnin diqqət çəkən məqamlarından biri kimi qiymətləndirilir.
Qeyd edək ki, avqustun əvvəlində yayılan məlumata görə, Ermənistanın ikinci dövri hesabatının 14–24 sentyabr 2026-cı il tarixlərində BMT-nin Məcburi İtmələr üzrə Komitəsinin 31-ci sessiyası çərçivəsində nəzərdən keçirilməsi planlaşdırılır. Azərbaycan QHT-ləri həmin proses zamanı Birinci Qarabağ müharibəsi dövründə itkin düşmüş azərbaycanlıların taleyinin də gündəmə gətirilməsini gözləyirlər.
İlahə BAYINDIR
