Beynəlxalq Atçılıq Federasiyasından Rusiya ilə bağlı mühüm qərar: Gənc idmançıların statusu bərpa edildi
ElAZ.İNFO xəbər verir ki, Beynəlxalq Atçılıq Federasiyası (FEI) rusiyalı gənc idmançılarla bağlı tətbiq edilən məhdudiyyətləri aradan qaldıraraq, onların idman vətəndaşlığını qurumun rəsmi bazasında bərpa edib. Rusiya Atçılıq Federasiyasının (FKSR) yaydığı məlumata görə, bu qərar 18 yaşınadək olan idmançılara şamil edilir.
Yeni qərara əsasən, “Uşaqlar”, “Yeniyetmələr” və “Poni çaparları” kateqoriyasında çıxış edən idmançılar artıq FEI bazasında neytral statusda deyil, birbaşa Rusiya təmsilçisi (RUS) kimi qeyd olunacaqlar. Bu dəyişiklik gənc süvarilərə imkan verəcək ki: Beynəlxalq turnirlərdə öz ölkələrini rəsmən təmsil etsinlər; Texniki nəticələr cədvəlində Rusiya bayrağı altında yer alsınlar.
Xatırladaq ki, 2025-ci ilin dekabrında Beynəlxalq Olimpiya Komitəsi (BOK) yeniyetmə idmançıların yarışlara öz bayraq və himnləri ilə qatılmasını tövsiyə etmişdi. FEI bu tövsiyəyə əsaslanaraq, rusiyalı gənc idmançılar üçün illərdir tətbiq olunan “neytral status” tələbini ləğv edib. Bu addım gənc nəsil idmançıların beynəlxalq təcrübə qazanması və peşəkar inkişafı üçün kritik əhəmiyyət kəsb edir.
Ruslan MƏMMƏDOV
