İspaniya millisindən inanılmaz seriya: Dünya rekordu yeniləndi

ELAZ.İNFO xəbər verir ki, İspaniya millisi futbol tarixində yeni göstəriciyə imza atıb. “Qırmızı furiyalar” UEFA Millətlər Liqasının qrup mərhələsində Xorvatiyanı 4:1 hesabı ilə məğlub edərək ardıcıl məğlubiyyətsiz oyunlarının sayını 40-a çatdırıb.

Bu nəticə İspaniya üçün yeni dünya rekordudur. Komandanın əsas vaxtda son məğlubiyyəti 2024-cü ilin martında Kolumbiyaya qarşı yoldaşlıq görüşündə qeydə alınıb.

Rəsmi oyunlar baxımından isə İspaniya sonuncu dəfə 2023-cü ilin martında Avropa çempionatının seçmə mərhələsində Şotlandiyaya uduzub.

İspaniya bundan əvvəl də öz rekordunu yeniləmişdi. Komanda ötən ilin yayında ardıcıl 38 oyunda məğlub olmamaqla əvvəlki göstəricisini müəyyənləşdirmişdi. Ondan əvvəl rekord 37 matçla İtaliya millisinə məxsus idi.

Qeyd edək ki, 2025-ci il Millətlər Liqasının finalında Portuqaliyaya penaltilər seriyasında məğlubiyyət bu hesablamaya daxil edilmir. Həmin qarşılaşmanın əsas vaxtı 2:2 hesabı ilə başa çatmışdı.

İspaniyanın yeni rekordu artıq növbəti oyunlarda qorunmalı olacaq və komandanın qarşısında daha bir statistik sərhədi keçmək imkanı yaranıb.

İslam MAHMUDOV