Rusiyada daxili bazarda ərzaq məhsullarının qiymət artımının qarşısını almaq və qiymətəmələgəlmə zəncirini tam nəzarətdə saxlamaq üçün mühüm addım atılır. Ölkənin beş əsas dövlət qurumu istehsalçıdan tutmuş mağaza rəfinə qədər bütün mərhələlərdə qiymətləri birbaşa izləmək imkanı qazanacaq.
ELAZ.İNFO verir ki, Rusiya Federal Vergi Xidməti (FVX), Sənaye və Ticarət Nazirliyi, Kənd Təsərrüfatı Nazirliyi, İqtisadi İnkişaf Nazirliyi və Federal Antiinhisar Xidməti (FAX) ərzaq məhsullarının qiymətlərinin şəffaf (uçdan-uca) monitorinqi üçün xüsusi məlumat bazasına çıxış əldə edə bilərlər. Bu barədə Rusiyanın “İzvestiya” qəzetinə Dövlət Dumasından məlumat verilib. 2026-cı ilin iyul ayında Rusiya Dövlət Duması birinci oxunuşda ərzaq məhsullarının qiymətlərinin şəffaf monitorinqi sistemini tətbiq edən iki qanun layihəsini qəbul edib: Aidiyyəti nazirliklərə və xidmətlərə Federal Vergi Xidmətindən ərzaq ticarəti ilə məşğul olan şirkətlərin və fərdi sahibkarların gəlirləri, xərcləri, mənfəəti və satış həcmləri barədə məlumatları əldə etməyə icazə verir. Bu məlumatlar qiymətlərin monitorinqi, onların dəyişmə səbəblərinin analizi və qiymətəmələgəlməyə təsir edən amillərin araşdırılması üçün istifadə olunacaq.
Vergi sirri təşkil edən bu cür məlumatların ötürülməsi qaydasını müəyyən edir. Qurumlar tərəfindən alınan məlumatlar vergi sirri rejimini qoruyub saxlayacaq və onlara çıxış yalnız səlahiyyətli vəzifəli şəxslərə veriləcək. Dövlət Dumasından verilən məlumata görə, vergi sirri təşkil edən məlumatları ala biləcək qurumların siyahısı ciddi şəkildə məhdudlaşdırılacaq və bura yalnız yuxarıda qeyd olunan 5 dövlət orqanı daxil ediləcək. Bu sistem vasitəsilə malların hərəkət zəncirinin bütün mərhələlərində qiymət artımının səbəblərini təhlil etmək və zəruri hallarda dərhal reaksiya tədbirləri görmək mümkün olacaq.
Ruslan MƏMMƏDOV
