ELAZ.İNFO xəbər verir ki, Sabirabad Rayon İcra Hakimiyyətinin təşəbbüsü və Mil-Muğan Regional Mədəniyyət İdarəsinin təşkilatçılığı ilə Novruzun müqəddəs çərşənbələrindən biri olan Od çərşənbəsi münasibətilə möhtəşəm bayram tədbiri keçirilib. Rayonun sevilən istirahət məkanlarından olan “Sabir bağı” ərazisində baş tutan tədbirdə rayon rəhbərliyi, idarə və təşkilat nümayəndələri, mədəniyyət işçiləri və geniş ictimaiyyət iştirak edib.
Rayon İcra Hakimiyyəti başçısının birinci müavini Həsən Həsənov və YAP Sabirabad rayon təşkilatının sədri Varis Rüstəmov çıxış edərək Od çərşənbəsinin xalqımızın milli-mənəvi dəyərlərindəki yerindən, bu ənənələrin gələcək nəsillərə ötürülməsinin vacibliyindən danışıblar. Ü.Hacıbəyli adına Uşaq Musiqi Məktəbinin müəllim və şagird heyəti, eləcə də yerli sənətçilər rəngarəng musiqi nömrələri təqdim ediblər.
Folklor nümunələri: Əhmədabad kənd Folklor evinin “Axısxa Halay-türk” rəqs kollektivi və ənənəvi Kosa-Keçəl personajları tədbirə xüsusi rəng qatıb. Pəhləvan şousu: “Cəngavər” pəhləvanlar qrupunun nümayiş etdirdiyi güc nömrələri tamaşaçılar tərəfindən maraqla izlənilib. Odun, işığın və yenilənmənin rəmzi olan bu çərşənbə Sabirabadda birlik və həmrəylik ruhunda, əsl bayram əhval-ruhiyyəsində qeyd edilib.
Ruslan MƏMMƏDOV
