ELAZ.İNFO xəbər verir ki, Rusiya Təhlükəsizlik Şurasının katibi Sergey Şoyqu Myanmaya işgüzar səfərinin yekunları ilə bağlı detallar açıqlanıb. Şoyqu ölkədə keçirilən parlament seçkilərini yüksək qiymətləndirərək, Myanma rəhbərliyinin Rusiya ilə strateji tərəfdaşlığı genişləndirmək niyyətində olduğunu bildirib.
Sergey Şoyqunun sözlərinə görə, yanvarın 25-də başa çatan ümumi parlament seçkiləri bir neçə illik hazırlıqdan sonra yüksək səviyyədə təşkil olunub: Qanunverici orqanda mütləq çoxluğu milli barışıq, daxili siyasi sabitlik və iqtisadi inkişafı hədəfləyən vətənpərvər qüvvələr qazanıb. İttifaqın Həmrəylik və İnkişaf Partiyası (USDP) Myanma parlamentində (Assambleya İttifaqı) yerlərin əksəriyyətini əldə edib. Yeni formalaşan hakimiyyət xarici tərəfdaşlar, xüsusilə Rusiya ilə sıx iqtisadi və siyasi əlaqələr qurmağa meyillidir.
Xəbərdə qeyd olunur ki, 2021-ci il fevralın 1-də baş vermiş hərbi çevrilişdən sonra yaranan vətəndaş münaqişəsinin fəsadlarına baxmayaraq, seçki prosesi 330 rayondan 265-də təşkil edilə bilib.
Seçkilər üç mərhələdə (28 dekabr, 11 və 25 yanvar) keçirilib. Ümumilikdə 57 siyasi partiyadan 5 mindən çox namizəd mübarizə aparıb. Onlardan 6 partiya ümummilli miqyasda, digərləri isə konkret region və ya ştatlar səviyyəsində təmsil olunub.
Ruslan MƏMMƏDOV
