NATO-nun Kosovodakı Sülhməramlı Qüvvələrinin (KFOR) missiya komandiri, general-mayor Özkan Ulutaş ABŞ Senatının Silahlı Qüvvələr Komitəsinin (SASC) üzvü, senator Coni Ernsti Priştinadakı “Camp Film City” qərargahında qəbul edib.
ELAZ.İNFO xəbər verir ki, keçirilən görüş zamanı komandir regiondakı mövcud təhlükəsizlik vəziyyətinə dair ətraflı məlumat təqdim edib. General-mayor Ulutaş KFOR-un Kosovoda yaşayan bütün sakinlərin təhlükəsizliyini və sabitliyini təmin etmək istiqamətindəki qətiyyətli öhdəliyini bir daha diqqətə çatdırıb. Görüş çərçivəsində KFOR komandiri Birləşmiş Ştatların NATO rəhbərliyi altında həyata keçirilən bu missiyaya verdiyi uzunmüddətli və dəyərli töhfələrə görə amerikalı senatora minnətdarlığını bildirib.
Qeyd olunub ki, KFOR BMT Təhlükəsizlik Şurasının 1999-cu il tarixli 1244-cü saylı qətnaməsinə uyğun olaraq, Kosovadakı bütün icmalar üçün təhlükəsiz mühit və sərbəst hərəkət azadlığını təmin etmək fəaliyyətini fasiləsiz davam etdirir. Missiya təhlükəsizliklə bağlı öz vəzifələrini icra edərkən Kosovo Polisi və Avropa İttifaqının Hüquq Qanunun Aliliyi Missiyası (EULEX) ilə sıx koordinasiyada çalışır.
Ruslan MƏMMƏDOV
